Shillong, Nohprah 03: Mynta ka sngi ka seng JSU kala ia kynduh ia u myntri rangbah ka jylla u Conrad K Sangma ha Jaitnia bad ha kane ka jingiakynduh kila ai da ka jingthoh ban dawa ba ia ka Border Out Post dei ban buh ha khappud sbak bad ka Assam ha Mukroh.
Ha kane ka jingiakynduh ia u myntri rangbah ka jylla kila ong ba shuwa ban buh ia ka BOP dei ban don ka jingjurip lang ia ka jaka bad kibor jong ka JHADC bad ki bor shnong ban ioh ban buh ia ka BOP ha khappud sbak ban iada ia ki paidbah nongshong shnong.
Ka JSU ha ka jingthoh kaba la ai mynta ka sngi kila dawa ruh ba ka sorkar ka dei ban pynkylla noh ia ka jingpynbna sorkar kaba la pynmih ha u snem 1951 ha ka por ka sorkar Assam ban wanrah biang ki 36 tylli ki shnong khasi sha Jaintia Hills.
Ka seng kala pynpaw ia ka jingpyrshah bad ka da pynrem ia ka jingkren u CEM jong ka KAADC bad ka JSU ka shem ba ka jingkren ka dei kaba pyniashruh jaidbynriew kum ka seng kan pyrshah ban tei kano kano ka jingtei ha katei ka jaka ha ka kyrteng u ba khlad.
Ha ka jingiakren kumba la thoh ka JSU ka ai khublei ruh ia ka sorkar kaba la kloi ban shim ia ka rai ban buh ia ki BOP ha khappud bad ka jylla Assam ban ai ka jingshong shngian ia ki paidbah nongshong shnong.
