Shillong, Nohprah 15: Ka kynhun National Federation of New State (NFNS) ha dien ka jingiakhih shong kyllain myngor kaba ar sngi kaba kila pynlong ha Jantar Mantar ha nongbah Delhi, mynta ka sngi kala phah ia ka dorkhas sha u myntri kam poh iing a sorkar pdeng ban dawa ban ai jylla la ka jong.
Ha kane ka dorkhas kaba la ai mynta ka sngi la kdew shai ba ka jingdwa jyll ki long na ka bynta ka ka Gorkhaland, Tipraland, Bodoland, Garoland, Bundelkhand, Vidharbha, Khasi bad Jaintia, Karbi Anglong bad Dima Hasao Autonomous State, Kuki State.
Ha kane ka dorkhas la ong ba kane ka jingdawa ban ioh jylla la ka jong ka dei katkum ki kyndon kiba don hapoh ka riti synshar jong ka Ri India, ka sorkar pdeng ka dei ban ai ia ka jylla katkum ka jingangnud jong ki paidbah katkum ka ktien kaba ki kren.
Kane ka jingdawa jylla la ka jong ka dei katkum ka histori bad ka riti dustur jong ki briew kiba don ha ki jaka kaba ki pan ia kane ka jingkwah jylla la ka jong, la kyrpad ia ka sorkar pdeng bab sngap ia kane ka jingdawa bad ban pdiang ia kane ka jingdawa.
Ia kane ka dorkhas kaba la phah sha u mytnri kam poh iing la soi da u president ka NFNS u Dr. Munish Tamang, President, u Nikman Marak Vice President, u Stalyn Ingti General Secretary, Bah KP pangniang President ka HSPDP bad kiwei kinongialam.
