PM participates in the golden jubilee celebration of the North Eastern Council meeting, in Shillong on December 18, 2022.
Shillong, Nohprah 18: U Myntri Rangbah Duh, u Narendra Modiu la ai jingkren ha ka jingialang jong ka North Eastern Council (NEC) ha Shillong mynta ka sngi.Kane ka jinglang ka long shi bynta ka jingrakhe ia ka golden jubilee jong ka North Eastern Council, kaba la seng ha u snem 1972.
U Myntri Rangbah Duh u la ai jingiaroh ia ka bynta jong ka NEC ha ka roi ka par jong ka thain shateilammihngi bad u la ong ba kane ka jingrakhe ia ka golden jubilee jong ka NEC ka wan ha ka por jong ka Azadi ka AmritMahotsav kaba dang iaid mynta.
U la ong ba u ju khot ki Asht Lakshmi ia ki 8 tylli ki jylla ka thain shatei lam mih ngi man ka por, u Myntri Rangbah Duh u la ong ba ka Sorkar ka dei ban trei halor 8 tylli ki rishot na ka bynta ka roi ka par jong ka thain kiba long ka ShongsukShongsain, ka Bording, ka kam Jngoh Kai, ka jingdon 5G, ka kolshor, ki rukom rep tynrai, ki Kam ialehkai, bad ki lad kiba don ha ka thain.
U Myntri Rangbah Duh u la ong ba ka thain shateilammihngi ka long ka khyrdop sha ka South -East Asia bad ba ka lah ban long ka jaka pdeng jong ka roi ka par jong kane ka thain baroh kawei.
Ban pynurlongia ki lad kiba don ha kane ka thain, ki projek ki bapher bapher kum ka Indian-Myanmar-Thailand trilateral highway bad kaAgartala-Akhaura rail project ki dang iaidshakhmat.
U Myntri Rangbah Duh u la ong ba ka Sorkar ka la iaid shaphrang na ka jingiakren shaphang ka ‘Look East’ policy sha ka ‘Act East’, bad mynta ka polisi jong ka, ka dei ‘Act Fast for Northeast’ bad ‘Act First for Northeast.’
U la kren shaphang ki jingjop ha ki kam ban wanrah ia ka shongsukshongsain ha ka thain da kaba pynkynmaw ba ki don shibun ki jingiakutpyndematiar kiba la dep iasoi, ki jingiakut kiba iadei bad u pud u sam kiba la pyndep bad ba ki kam pyntriem ki la duna bha.
U la kren shaphang ka jingkut jingmut ka India na ka bynta ka net – zero ha kaba u la ong ba ka thain shateilammihngi ka lah ban long kaba khraw bor ha ki kam pynmih bording hydropower. Kane kan pynlong ba ki jylla jong kane ka thain ki pahuh ia ka bording, bad kane kan iarap ia ka jingpyniar ia ki karkhana bad kan plie lad ioh kam.
U la kren shaphang ki lad kiba don ha ka thain ha ki kam jngohkaibad u la ong ba ki projek shna jingkieng kiba la sah teng da ki phew snem mynta ki dei kiba la pyndep.
Ha kine ki 8 snem ba la dep, ka jingdon ki kad liengsuin ha ka thain ka la kiew na ka 9 sha ka 16 bad ka jingpynherliengsuin ka la kiew na kumba 900 shuwa u snem 2014 sha kumba 1900 mynta.
Ki don shibun ki jylla ha ka thain kiba la rung nyngkong ha ki kam rel jong ka ri bad ki don ki jingpyrshang ban pyniar ia ki lad lyngba ki jaka shong um ruh. Ka jingjrong jong ki surok bah national highway ka la kiew da 50% naduh u snem 2014 ha ka thain.
U la ong ba hadien ka jingsdangia ka skhim PM-DevINE, ki projek na ka bynta ki jingdon jingem ha ka thain shateilammihngi ki la kham stet. U la ong ruh ba ka Sorkar ka dang trei ban kyntiew ia ka jingiasoh digital ha ka thain shateilammihngi da kaba pyniar ia ka optical fibre network.
U la kren shaphang ka jingkyntiew ia ki jingdon jingem Aatmanirbhar 5G bad u la ong ba ka 5G kan iarap ia ka jingkiew jong ki kam 5G, ki kam ai jingshakri ha ka thain. U la ong ba ka Sorkar ka kut jingmut ban pynkylla ia ka thain shateilammihngi sha ka jaka pdeng jong ka jingkiew ka ioh ka kot bad ka jingkiew jong ka deiriti.
Ha kaba iadei bad ki lad kiba don ha ki kam rep ha ka thain, u Myntri Rangbah Duh u la kdew sha ki lad kiba don ha ki rukom rep tynrai ha kaba ka thain ka lah ban long ka nongialam. U la ong ba lyngba ka Krishi UDAN, ki nongrep ha ka thain ki lah ban phah ia ki mar rep jong ki sha kiwei kiwei ki bynta jong ka ri bad shabar ri ruh.
U la kyntu ia ki jylla ka thain shatei lam mih ngi ba kin iashim bynta ha ka National Mission on Edible Oils – Oil Palm kaba dang iaid mynta. U la batai ruh kumno ki drone ki lah ban ai jingiarap ia ki nongrep ba kin pynbeit ia ki jingeh ba ki iakynduh bad ruh ban pynpoi ia ki mar rep jong ki sha ki iew.
U la kren shaphang ka bynta jong ka thain ha ki kam ialehkai bad u la ong ba ka Sorkar ka dang trei ban ai jingkyrshan ia ki nongialehkai na ka thain lyngba ka jingwanrah ia ka skulbahialehkai kaba nyngkong jong ka ri ha ka thain.
Shuh shuh, palat 200 tylli ki Khelo India Centre ki dei kiba la ioh jingmynjur ban seng ha ki 8 tylli ki jylla ha ka thain. U la ong ruh ba ki nongialehkai na ka thain ki ioh jingmyntoi na ka skhim TOPS.
U Myntri Rangbah Duh u la kren ruh shaphang ka G20 Presidency jong ka India bad u la ong ba ki jingialang hapoh kane kan wanrah ia ki briew na kylleng ka pyrthei sha ka thain shateilammihngi. U la ong ba ki jingialang G20 ki dei ki lad ba iahap ban pyni ia ka jinglong, ka deiriti bad ki lad kiba don ha ka thain.
