Shillong, Kyllalyngkot 15: Mynta ka sngi ki pulit jong ka East Khasi Hills District kila ioh ban bat ia kawei ka kali Swift kaba don ia u number ML05-N-2170 bad kane ka kali ki la ioh ban kurup shiphew song u drok Heroin bad ka dor jong u kala kot sha ka T.70 lak tyngka.
Ki pulit kila ioh ban kem ar ngut ki briew na kane ka kali kiba la shah kynnoh ba ki dei ki nongkhaii drok, na kine ki briew ki pulit kila ioh ban kurup ar tylli ki mobile phone bad ki pulit kila register ejahar pyrshah ia kitei ki briew.
Kane ka jingshlur jong ki nongkhaii drok ban wan pynrung sha ka jylla kala buh ha ka jingeh hynrei na ka liang jong ki pulit ruh kila rai skhem ban rat ia kane ka jingsniew ha kaba kila pynkhlain shuh shuh ia ka jingtrei kam ban ia khun pyrshah ia ka kam drok ha ka jylla.
Na ka liang jong ki pulit ka jylla ki la dang pynkhlain shuh shuh ia ka jingtrei kam ban thwet ia ki nongkhaii drok katkum ka sorkar kala shim ia ka rai ban shim ia baroh ki lat ki lynti ban pynduh jait ia kane ka kam dih drok na ka jylla.
