Shillong, Rymphang 02: Mynta ka sngi u President ka party HSPDP u bah KP Pangniang u la pynlait paidbah ia ka kular elekshon jong ka party, kawei na ki mat kiba ka party kala buh ka long ba ka pyrshah ia ka jingtih Uranium ha kane ka jylla Meghalaya.
Kiwei ki mat kiba kham ha khmat kaba ka party kala buh ka long ka jingiapynbeit ia u pud u sam ka jylla, ka Inner Line Permit, ka party ka pyrshah ia ka Lynti Rel katba ym pat don ia ki lat jingda na ka jingwan rung kyrthep kiwei ki jaidbynriew bad kiwei kiwei kikam pynroi kiba ka party kan pyntreikam.
Ha kane ka sngi ka party kala pynbna ruh ia ka kyrteng jong ki saw ngut ki kyrtong, kiba ban ia khun ia kane ka MLA elekshon ka ban long ha ka 27/2/2023, na 29-Mawkynrew bah Martle N Mukhim, 13-Mawryngkeng bah Wyraiwan Sohtun, 23-Sohiong bah Sandondor Ryntathiang, 25-Mawsynram bah Starfing Jove Langpen Pdahkasiej.
Haba kren ha ki lat pathai khubor u President ka seng la ong ba baroh ki kyrtong kaba ka party ka la dep ban pynbna haduh mynta ki long 11 ngut, la ong ba ki don bun kiba la pan tiket hynrei ka party haba ka ai ka hap ban da peit bniah ia kino kiba dei ban ai.
Haba jubab ia jingkylli la ong ba ka party HSPDP ka dei ka party kaba la rim tam ha kane ka jylla bad naduh u snem 1972 ki briew kila jop MLA, kila long myntri sorkar na ka party hynrei ki phet noh na ka party bad mynta ruh ar ngut ki MLA kila phet ban tip ia ka daw tang kito kiba phet ki lah ban jubab.
Kaei kaba ka party ka dang ieng haduh mynta naduh ba la seng ia ka party haduh mynta ka dang ieng ha kajuh ka nongrim, wat la kala ia kynduh shibun ki jingeh hynrei ka ieng skhem bad ha kane ka kynti kaba mynta ruh. Ha kane ka sngi la don lang u General Secretary ka party ubah Panbor Ryntathiang bad kiwei kiwei ki nongkit kam ka party.
