Shillong Rymphang 17: Ka Chairperson jong ka Social Media & Digital Platform ka AICC ka Supriya Shrinate u la ong ba ka jingkular ka BJP ban thung ia ka Special Task Force hapoh ka jingialam jong u Nongbishar ba la shongthait jong ka Supreme Court ban tohkit ia ki kam bamsap pyrshah ia kane ka sorkar MDA, ka long kaba kamkai namar ba kane ka BJP kadei kaba don bynta lang ha ka sorkar MDA.
Ka Chairperson ka AICC ka la ong ba ki paidbah ka jylla ki kwah ban tip ia kaei kaba ki la leh ha kine ki san snem ba ladep ha ka por ba ki don lang ha ka sorkar MDA.
” Ka BJP ka la sngewthuh ba kan nym lah ban jop eiei ha kane ka jylla Meghalaya, namarkata ka jingpynbna ia kane ka Special Task Force ka long ban shu pynsmiej ban pyntieng ia ki party barit ,” ong ka Supriya Shrinate.
La ong ba u bah AL Hek bad u bah Sanbor Shullai, kidei kiba don bynta lang ha ka sorkar MDA. ” Hato ka BJP kan tohkit lang ia la ki jong ki briew kiba don bynta ha kane ka sorkar bamsap. Kine ki mat treikam ba ka BJP ka la pyllait paidbah mynta ka sngi ki long tang ki jingkren tang na ki rymmiang shyntur,” ka la ong.
Ka Supriya ka la kynnoh ba ka BJP ka long ka jingma ia ka jaidbynriew jong ka Meghalaya bad kane kadei ka party kaba long pyrshah ia ki niam Khristan.
Kane ka nongialam ka AICC ka Supriya, ka la ong ba ki paidbah ka jylla ki kwah ban tip bad ban kylli ia ka BJP bad u Myntri Rangbahduh ka ri India, ‘ La ka BJP kan pyntreikam ia ka Uniform civil code ha kane ka jylla Meghalaya’.
La ong ba ka BJP ka don ha ka bor ha kine ki 8 snem ha ka sorkar pdeng bad ka don bynta lang ruh ha ka sorkar MDA. Hynrei hapdeng kine ki snem ka la leh aiu ia ki paidbah ka jylla.
” Ka BJP kadei ka ATM na bynta kiwei ki party ha kane ka jylla Meghalaya,” ka la ong
Ha kajuh ka por, la buh jingkylli ‘Hato ka party TMC kadei paralok sop sop jong ka BJP? Hato ka jingwan jong ka TMC ha Goa ka long tang na bynta ban phiah ia ka Vote jong ka Congress. Lada kim don bynta lang bad ka BJP ha kane ka jylla Meghalaya balei ka sngap jar ia ka jingleh jong ka BJP.
