Shillong, Lber 12: Mynta ka sngi ki dkhot ka KSU UMsning kila ioh bat ia ki briew kiba thmu ban wan bylla sha Meghalaya kiba pynkhein ia ka Aiñ Inter-state Migrants Workmen (Regulations of Employment and Conditions of Service) Act 2011 bat pynphai ka KSU Umsning Circle ia ki bar jylla.
Ki dkhot ka KSU Umsning circle ha ka nohphai sngi jong ka 12 tarik u Lber 2023 ka la ioh ban bat ia ki bar jylla ba thmu ban wan bylla sha ki jylla Meghalaya sha ki thain Jaintia hills District khlem ki kot ki sla kiba biang.
Ka jingiohbat jong ka KSU Umsning Circle ia ki tei ki bar jylla ka dei hadien ka jing ipher ia ka rukom wan ka jong ki haduh 2 bus kiba don ia u number kali AS-01 GC 7338 bad AS-01 KC 5638 ia ki tei ki bar jylla la bat noh ha ki thaiñ Umsning ha ba la kylli pyrthew ki dei ki bym biang ki kot ki sla kiba don palat ia ki 90 ngut ki bar jylla.
Ka KSU kum ba ka la ju phah ka kyrwoh ia ka sorkar jylla bad ka sorkar pdeng ba kin pynkhlaiñ ia ki aiñ ban pyrkhing ia ki bar jylla hynrei kaba lyngngoh ba wat hapoh Infiltration check gate ki nongtrei kim da pyrkhing hynrei ki tei ki bar jylla kila kynnoh ba ki siew tang 4000/ tyngka bad ki la ioh lad ban rung laitlan bad poi shaduh Umsning.
Kitei ki bar jylla ki dei kiba thmu ban leit bylla beaiñ sha ki Factory Cement sha East Jaintia hills District. Ka jingiai kuman jong ka sorkar jylla ban pyrkhing ka pynlong ruh ia ki district ba marjan bad ka Assam ban jur ki jinglute,jingtuh, khaïi Drok bad bun ki runar ba thmu ba pyniap ia ki mynsiem ba lui lui kiba ngi la sakhi ha kine ki sngi ki taiew ba mynta.
Ka seng KSU kan pyndep la ka sienjam bad ka maham tyngeh ia ki Nongai bylla ba mlien ban wanrah ia ki nongtrei bar jylla khlem ki kot ki sla ki ba biang namar ki dei ma ki ba pynshlur bad pynkheiñ ia ka Aiñ Inter-state Migrants Workmen (Regulations of Employment and Conditions of Service) Act 2011 kaba don la ki kyndon ha poh jong ka .
Hadien ba ki dkhot ka KSU Umsning Circle ki la tohkit bad la wan shimti noh da ki pulit Umsning kiba la shimkhia ban leit pynphai ia kitei ki bar jylla bad ki pynthikna ruh ba kin leit pynphai noh ia ki mardor sha Assam.
