Shillong: Lber 21: Ka seng Khun Hynñiewtrep National Awakening Movement (KHNAM) ha ka sngi-ba-ar ka 21 tark lber 2023,ka la pynkynmaw ia ka sorkar jylla haba iadei bad ka jingdawa jong ka seng ban pynduhnoh iaka personal interview ha ka group B, C bad D ha baroh ki jaka treikam jong ka sorkar.
Haba iakren ha ki lat pathai khubor mynta ka sngi ha Shillong Press Club u Vice-president jong ka KHNAM bah Thomas Passah, u la iathuh ba ka jingdawa jong ka seng ban pynduh noh ia ka personal interview ka long ban pynduh noh ia ka jingthep kam, thep jam ha ka lynti bym beit, ha kaba u la ong ruh ba ka personal interview ka pynsepei ia ka por jong ki ophisar bad ia ka pla tyngka jong ka sorkar ruh kumjuh.
U bah Thomas Passah, u la ong ruh ba kat kum ka notification jong ka sorkar pdeng ha ka 1tarik kyllalyngkot 2016 ka la pynduh pyndam noh ia ka personal interview lem bad ki 23 tylli ki jylla jong ka Ri. Kumta ka kynhun jong ki ruh ka la leit ban dawa na u Myntri Rangbah jong ka jylla da ka jingthoh ba u dei ban leh lem da ki juh ki sienjam kumba leh lem da ka sorkar pdeng bad kiwei pat ki jylla.
U la iathuh shuh-shuh ruh ba kum ka jylla kaba la don mynta 50 Snem ka la Donkam ia ka recruitment policy, khnang ba kan lah ban ai ka jingiarap ia kito ki khun samla kiba thep kam thep jam bad ba kan wanrah ruh ia ka special precedure ka ba don ka por ban buh lada ka don ka kam balait hadien shibnai hap ban khot noh ia ka written test bud sa ka jingpynbna ia ki resol bad kaba khatduh hi ka long ban thungkam noh ia kiba la shah jied.
Hynreì haba iadei bad ka thungkam thungjam jong ka sorkar jylla hi ka long thurmur bad kaba ialam bakla, kaba pynbud sniew ruh ia kito ki samla thep kam thep jam. U bah Passah u la iathuh ruh ba haba iadei bad ka jingdawa jong ka seng kaba la dep phah sha u Myntri Rangbah jong ka sorkar jylla haba iadei bad ka jing pynduh pyndam noh ia ka personal interview naduh u bnai October 2022, hynreì haduh mynta ka seng hi kam pat ioh satia ia ka jubab.
Shuh shuh U bah Thomas Passah u la pynpaw ruh ia ka jing sngewkhia bajur haba iadei bad ka jingpynhap jong ka sorkar jylla ia ka state reservation policy ha ka academic reservation. la ong ba ka state reservation policy 1972 ka khlem kren satia ia ka academic reservation bad bun tylli ki seat na ka quata jong ka sorkar ki sepei lut namar ba ka sorkar jylla ka leh ia ka bhah kyrpang khlem peit bniah, u la ong ruh ba ka state reservation policy ka dei katkum ka Article 16 bad ka academic reservation kadei katkum ka Article 46 katkum ka riti synshar jong ka Ri India.
U bah Thomas Passah u la iathuh ruh ba haba iadei bad ka quata pule, donkam ban iaid katkum ka merit based khnang ba ka quata kan ym sepei, u kyrmen skhem ruh ba ka sorkar jylla kan leh eiei haba iadei bad kine ki artylli ki mat kiba ktah bha ia ki paidbah nongshong shnong jong ka jylla, ha kaba u la pynpaw ruh ba u kwah ruh ba kan don ka jingiatai ha ïngdorbar thawaiñ jong ka jylla ha ka dorbar mang tyngka ba dang iaid mynta namar kane dei ka mat kaba ktah ia u paidbah baroh.
