Shillong, Jymmang 05: Mynta ka sngi la pynlong ia ka jingialang ban pynkup burom ia ka sorkar kaba lah ban sdang ban pynioh ia ka jingtih dewiong da ka juk stad saian kaba mynta ia kaba la pynlong ha Khliehriat.
Haba kren ha kane ka jingialang u myntri rangbah ka jylla la ong ba ka jingialang mynta ka sngi ka long kaba sah kynmaw namar ba ka jingkhang tih dewiong da ka NGT kala ktah ia ka ioh ka kot ki paidbah ka jylla khamtam eh ia ki briew jong ka East Jaintia Hills District.
Ka jingkhang tih dewiong kala wanrah ka jingeh kaba khraw ia ki briew kiba shaniah ia ka ioh ka kot jong ki ha ka kam tih dewiong, dei na kane ka daw kaba la pynlong ia u kum u myntri rangbah ka jylla ban shim khia ban pynthikna ban ioh tih dewiong biang ha ka jylla.
Ha dien bala ioh ia ka rai ban weng noh ia ka jingkhang tih dewiong, ka sorkar kala hap ban shna ia ki kyndon ban tih dewiong da kaba bud ia ki kyndon kiba la buh ban pynthikna ba ka jingtih dewiong kan long kaba shnhian ryngkat ka jingiada ia ka mariang.
U Myntri Rangbah la ong ba ha kine ki lai snem ka sorkar jylla bad ka sorkar pdeng kila ia trei shitom ban ban pynwan dur ia ki kyndon kiba ia hap bad ka jylla Meghalaya ban tih dewiong katkum ka juk stad saian kaba mynta da kaba but ryntih ia ki rukom bat khyndew namar ka khyndew ka dei jong ki paidbah.
Ha kane ka sngi u myntri rangbah ka jylla u la ai khublei ia ka tnad ba dei peit iaki mar pohkhyndew, ki muktiar kiba, ki stad mariang bad kum juh ia ki trai par kiba la kyrshan ia ka sorkar, ha kaba mynta la lah ban wanrah ia ka polisi bad ki kyndon ban tih dewiong kane baroh ka dei ka jingiatreilang da baroh.
La ong ba ka sorkar kan dang iaid bteng ban ia treilang bad ka sorkar pdeng khnang ba kiwei ki briew kiba don ia ki par dewiong kin ioh laisein ban tih dewiong, ka tnad ba dei peit ia ki mar pohkhydnew kan pynlong ia ki jingpynshai paidbah kumno ban apply ban ioh laisen ban tih dewiong.
La ong ba shisien bala ioh ban sdang biang ia ka kam tih dewiong kan wanrah ruh ia ka jingkylla ha baroh kiwei ki jaid karkhana, ka jingioh tih dewiong da ka juk stad saian kan wanrah ka jingkylla ha ka ioh ka kot ki paidbah ha baroh ki liang.
Ha kane ka jingialang u Secretary ka tnad b dei peit ia ki mar poh khyndew u bah E Kharmalki la iathuh ba ki don 17 tylli ki aplikoshon bad kitei la dep ban phah sha ka sorkar saw tylli, ha kane ka jingialang pynkup burom la don lang u symbut myntri rangbah u bah Sniawbhalang Dhar, ka kong Santa Mary Shylla, Ha kane ka jingialang da ki bun spah ngut ki paidbah kila ia don lang.
