Shillong, Jymmang 09: Ka seng Hynñiewtrep National Youth Movement (HNYM) central body lem bad ka HNYM West Jaiñtia Hills District, ka la leit ban aiti ia ka dorkhas sha ka Myntri jong ka Tnat ka koit ka khiah jong ka sorkar jylla, ka kong Dr. M.Ampareen Lyngdoh ha ophis treikam jong ka ha secretariat, haba iadei bad ka jingbymtrei kam ka hospital MCH ba 100 jingthiah ha West Jaintia Hills District bad kiba bun ki jingduna ha Civil Hospital Jowai.
U nongialam ka seng u bah Donlang Nongbri u la iathuh ba na ka liang jong ka seng HNYM ka la dep jurip ia katei ka jaka sumar mynha ka 5 tarik iaiong, mynta u snem, ha ka jing leit jurip ka jong ka seng la shem ba kane ka jaka ai jingsumar ba la plie da u Myntri Rangbah jong ka jylla u Conrad Kongkal Sangma ha ka 3 tarik Nohprah 2022 kam pat treikam satia haduh mynta mynne.
U working president jong ka HNYM central body,u la iathuh, hadien ba la lap ia ka jing-bym treikam katei ka jaka ai jingsumar, ka seng ka la shim ia ka sienjm ban leit kynduh ia ka myntri jong ka Tnat ka koit ka khiah jong ka sorkar jylla ban pynsngew ia katei ka mat kaba la ktah ia ki paitbah katei ka dong ka thaiñ
Ha katei ka jingiakynduh Ka seng ka la buh ruh ka jingdawa ba katei ka jaka ai jingsumar ka dei ban don ia baroh ki jing donkam la kadei ki doktor, ki nos, ki dawai dashin, X-ray machine, ka MRI scanning machine kiwei pat ki jing donkam haba iadei bad ka jingai jingsumar ia ki nongpang.
Ha kajuh ka por Ka seng HNYM West jaintia Hills District ka dawa na ka sorkar, ka dei ban plie noh kloi katba lah ia katei ka jaka ai jingsumar ba kan lah ban ai ka jingshakri ia ki paidbah jong ki artylli ki district kiba don ha ki bynta jong ka jaiñtia hills kata ka West bad East Jaiñtia Hills District.
Kumta na ka liang ka seng ka la ban jur ia ka myntri ka Tnat ka koit ka khiah jong ka sorkar jylla ba kan shimkhia haba iadei bad ka koit ka khiah, namar ha kitei ki bynta ki don Shibun ki long-ïing long sem kiba duk bad ki donkam ban ioh ia ki lad ai jingsumar na ki hospital sorkar.
