Shillong Jymmang 13: Ka Synkhong Rympei Thymmai (SRT) ka la ong, ka jingkam ba ka jaidbynriew Khasi kadei ka ri ba kyntang bad ka dustur ba kyrpang, kane ka long tang ka kyntien hamsaia bad kam long kaba kyrpang.U President ka SRT u bah Teibor Khongji haba kren sha ki lad pathai khubor, u la ong ba ka jaidbynriew Khasi kam long kaba kyrpang namar ba lada dei kata ka ri ba kyrpang kin nym don ki jaka ri Khunswet, ki khun ba duna dkhot met, ne ki jaka ri tymmen ba la shah iehnoh ha ri Khasi Jaintia.
U bah Teibor u la ong ba ha ka jingwad jingtip jong ka seng, la lap ba ka jingdon bun ki khun kiba ana kiba duna dkhot met kidei kiba shim jait na ka kmie ym na u kpa.
Katkum ka jingwad jingtip ka seng, la ong ba ka jingshim jait na ka kmie ka pynmiih bun ki khun ba duna dkhot met, ki iing ri Khuswet, ki jaka ri tymmen bad ka mih ruh ki jingshah nionbein ki khun ki kti.
Ka ri Khasi Jaintia jong ngi kam dei kaba kyrpang hynrei kadei kaba lyngkrang namar ba ka iing ba ri ia ki tymmen kiba la shah iehnoh ki don haduh 34 ngut kiba la rejister kynthup 26 ngut kidei ki kynthei bad ki shynrang ki don tang 8 ngut.
Lada ong ba kadei ka ri tip briew tip Blei tip kur tip kha, balei ki dang don ki kmie ki kpa tymmen kiba dang shah iehnoh ha ka kur ha ki khun, ong u bah Teibor.
La bynrap ruh,Haba ki wad bniah, ngi lap ba baroh ki khun kiba duna dkhot met kynthup kiba matlah, kiba kyllut bad kiwei de, kidei kiba ai jait sha ka kmie. Katkum ka jinglum jingtip ba la ioh na ka Khasi Disabilities Association, la lap ba naduh ka khanasumari jong u snem 2007-2017.
Ki khun ba don jingduna ha ki dkhot met ki don 44317 ngut ha Meghalaya ki bym pat register, katba kiba la rejister ki don 16000 tam naduh u snem 2018 haduh mynta. La lap ruh ba ka jingai jait kmie kan pynlong ia u shynrang ba un nym don ka jingkitkhlieh bad u lyngkrang.
U la ong ba ki Khasi Jaintia ki don tang 13 lak ngut ka jingbun paid, hynrei ki kes jong ki jingdon ki briew ba duna dkhot met, ki tymmen kiba shah iehnoh bad kiba shah ieh khunswet ki nang roi kat nang mih ki sngi.
Ka seng SRT ka la ong ruh ba lada la pynhiar pateng ia ka jait u kpa sha ki khun ki kti ,haba iadei bad ki kam khaii pateng ruh dei ban hiar pateng sha ki khun shynrang.
U bah Teibor u la ong ruh ba mynta ki Kynthei wat ha ki Dorbar Shnong ruh ki la ioh ban shim bynta hynrei mynta ia kane ka jingpyrshang ban shim jait u Kpa ki ia pyrshah.
Haba ka kynthei ka la lah ban shim bynta ha ki Dorbar shnong da kaba pdiang ba la dei katkum ka jingkylla ka por, hynrei haba ngi ruh ngi iaid ia ka lynti ba ka ladei ka por ba shim jait sha u kpa, ki ia pyrshah, ong u President ka SRT.
U la ong ba khnang ba ki paidbah kin sngewthuh halor ka jingai jait kpa, ka seng kan sa pynlong shuh shuh ia ki jingwad bniah halor kane ka mat.
 |
ReplyForward
|
