Shillong, Jymmang 21: Ban pyntyllun ia ki shalyntem jong ka jingshakri Blei, hadien ba ka jingkharoi ka jingdon jong ki Balang hapoh ka Mawthoh Myrdon District, kumta na ka liang ki bor jong ka Ri Bhoi Sepngi Presbytery hapoh ka Ri Bhoi Synod, ki la ibit ban phiah noh ia katei district sha ki ar tylli ki Pastorate, kata ka Myrdon Pastorate bad ka Mawthoh Pastorate.
Kumta lyngba ka Special Standing Committee ka la pdiang bad mynjur ban phiah noh sha ki ar pastorate ne district bad rah ia kane ka kam sha ka dorbar district bad na ka dorbar district la pdiang bad phah sha ka Presbytery, ha kaba ka Presbytery ruh kaba la long ha Umklai mynta u snem 2023, ka la pdiang bad mynjur ban pdiang kumba ka long.
Hadien ba la ioh jingmynjur na ki bor presbytery, la ibit ban shaniah ha ki rangbah ban leit thung ia kitei ki ar pastorate, kaba ia ka Mawthoh pastorate la thung ha ka 21 tarik Jymmang, 2023, mynta ka Sngi U Blei, ha ka Balang Mawlyngkhung da u Pastor KE Rympeit bad u Tbn RM Pamshong.
Ki Balang kiba hap hapoh ka Mawthoh pastorate ki kynthup ia ka Mawlyngkhung, Banbudai, Rtiang, Thad, Sohliya bad Jukiang, bad ka jingdon ki dkhot baroh haba kheiñ kyllum ki long 4462 ngut.
Kum ka dak ka jingthung pastorate thymmai, la plie ia u maw thoh kyrteng ne ki dak ha u maw ryngkat bad ki jingkyrkhu kyrdoh da u Pastor KE Rympeit, uba la ai ki kyntien syllok, ryngkat ka jingsakhi lang da ki nongsharai, ki rangbah balang, ki dkhot ki ar pastorate, ki riewdkhot ka Balang bad kiwei kiwei.
U Pastor Rympeit haba pharia na ka Kitab Bakhuid, u la ban jur ba kum ki nongtrei kin pyni da ki kam ym ban shu lapmiet tang ha ki jingiakren bad kyntu jur ruh ba ki dkhot hapoh ka pastorate kin sei ki soh kiba seisoh bun spah shah.
Ki pastor ba dei khmih hapoh katei ka pastorate thymmai ki kynthup ia u Pastor I.S Makdoh bad u Pastor E.S Syiem.
Ha katei ka jingthung pastorate thymmai, la iohsngew ruh ia ki sur kynud ba sngewthiang na ka CE Society Mawlyngkhung, bad kumjuh ruh ha ka jingiaseng ba ar sien da ka jingsyllok na u Tbn RM Pamshong bad ki sur kynud sngewthiang na ki ar tylli ki CE Society ba kynthup ia ka CES Thad bad CES Banbudai.
Lah ruh ban pynkynmaw hangne ba ka Myrdon Pastorate thymmai ka long kaba nyngkong eh kaba la dep thung myn ha ka 23 tarik Iaiong, 2023, ha ka Balang Nongbah Myrdon da u Pastor MB Makri bad u Tbn TJ Umdor.
