Shillong, Jymmang 29: Ki kynhun shipai BSF na ka 172 Bn kiba don ha Ratacherra ha ka sngi u blei kila ioh ban kurup 20 tylli ki muid na Umkiang katba dang thmu ban phah ia ki sha Bangladesh, kine ki muid la wan kit na Kalain na Assam.
Ki shipai BSF haba la poi trok kiba wan na Assam kila pynsangeh hynrei kila phet na ka jaka ba don ki shipai BSF bad ki BSF kila beh ia kine ki trok bad la ioh ban khang kdong ha jan Petrol Pump kaba jngai haduh 10 km jan Umkiang.
Haba ki BSF kila khylli ia ki jingtap terpal jong ki ar tylli ki trok la shem ba ki don ki Muid, ha kawei ka trok 10 tylli bad ha kawei 10 tylli baroh ki muid kiba la ioh ban kurup ki long 20 tylli, ia kine ki muid la thmu ban pynrung sha Bangladesh.
Katba ki BSF ba dei jong ka 04 Bn kila kem 17 tylli ki msi na Rongtilla katba dang thmu ban phah sha Bangladesh, naduh u bnai Kyllalyngkot haduh mynta la ioh ban kurup haduh 1669 tylli ki muid, ia ki baroh la aiti sha ki Pulit ka jylla ban leh ia kaba don kam katkum ka ain.
