Shillong, Nailur 01: U bah Synshar Khymdeit mynta ka sngi u la wan ban pynshai ba, ka kyrteng ka dei ka jong u hynrei ngam dei pat u ba dawa pisa kumba la mih khubor, ha kine ki sngi kaba la paw ka kyrteng jong u.
Haba kren ha ki lat pathai khubor mynta ka sngi ha Shillong Press Club, u bah Synshar Khymdeit ha ka jingiadon lang u bah Bless Dkhar President ka HNYF jong ka Shillong City, u bah Kyrshan Khymdeit u hynmen la pynshai “ Nga dei u Synshar Khymdeit, ngam dei pat u ba dawa pisa kum ba la mih khubor”.
La iathuh ba ha dien ba la iohi ba kala don kata ka jingdawa pisa na ka seng HNLC kaba la mih ka kyrteng jong u, u la sngew kyndit bad halor kane u la leit ban ai ia ka ejahar hapoh Mawlai Police Station bad ha dien kata u la leit ruh ban kynduh ia ki pulit halor ka ejahar kaba u la ai.
La ong ba u la shu sngap noh da ka jingshniah ba ki pulit kin sa leh ia kaba don kam, hynrei ka mih biang ka kyrteng jong, kumta u la ia kynduh ia ki nongialam ka HNYF ban iakren ia kane bad mynta la wan ban pynshai halor ka jingmih ka kyrteng jong u ban dawa pisa ha ka kyrteng ka HNLC.
U bah Kyrshan Khymdeit u hynmen jong u bah Synshar Khymdeit u la ong ba u para jong u yn nym lah ia kita ki kam kumba la kynnoh, u la ong ba u kren ia kane kum u hynmen namar u tip la u jong u para ba umd ei u briew u ba kumta dei na kata ka daw ba kila u jor sha ki pulit.
U bah Bless Dkhar u la ong ba, ha dien ba ka seng kala ioh ia ka jingujor wat la kam kam ka kyrteng jong ka nongujor, kala shim khia ban pynbna ba kin wat ia uta u Synshar Khymdeit bad mynta ka sngi u la wan ban ia kynduh ia ki nongialam ka seng ha ophis treikam.
La iathuh ba lyngba u bah Sadon Blah President ka HNYF ban long u ksiang ha kane ka jingiakren ia suk la ia kren bad u Vice Chairman ka HNLC lyngba ka phone ha kaba la pynshai ka kam don kum kata ka jingleh na ka liang u bah Synshar Khymdeit.
U bah Bless President ka seng HNYF Shillong City la ong ba kumba kala paw kyrteng ki dang donruh sa kiwei ki kyrteng kiba pyndon kam ia ka kyrteng jong ka HNLC, halor kane u nongialam ka seng u kyntu ia ki pulit ban shim khia ban tohkit bniah ia kane ka kam bad ha juh ka por ki pulit kin ai ka jingiada ia u bah Synshar khymdeit ioh mih ka jingma na kito kiba la shim bad pyndonkam I ka kyrteng jong u.
