Shillong, Nailar 08: Ka Hynniewtrep Youth Council (HYC) mynta ka sngi ka 8 Nailar 2023 ka la dawa na ka sorkar jylla ban tei da ka Shillong Campus jong ka Captain Williamson Sangma State University kumjuh ruh ban tuklar da ka ba thaw aiñ ka ban khmih ia ka jingrem ka bai klas ha ki jaka pule sorkar bad ki jaka pule kiba khlem ioh jingiarap da ka sorkar.
Haka dorkhas ba la aiti ha u Myntri ka tnat pule puthi ka jylla u Rakkam A Sangma, U General Secretary ka HYC u samla Roykupar Synrem u la ong, halor ka jingmih ka jingpyrshah ban pyntreikam ia ka NEP 2020 bad ka jingeh ki samla pule ban ioh Admission ha NEHU naka ka jingpyntreikam ia ka CUET, ka long kaba kyrkieh ia ka sorkar jylla ban shim ki sienjam ban wanrah noh da ka State University hapoh ka nongbah na ka bynta ka jingmyntoi ki samla pule jong ka jylla.
U la pynpaw ba dang shen ka sorkar jylla ka la plie paidbah ia ka Captain Williamson Sangma State University ha Garo Hills, u samla Roykupar Synrem u la ong, ka seng ka dawa na ka sorkar ban shim khia mardor ban wanrah ka jingsynshar kaba iajan bad ki paidbah da ka ba wanrah noh da ka ophis Regional Campus/Office hapoh ka jingkhmih da u Pro-Vice Chancellor bad ka ophis Registrar ba pura ha Khasi-Jaintia Hills region.
U bah Roykupar Synrem u la iathuh, na ka liang u Myntri ka tnat pule u Rakam A Sangma u la kular ba ka sorkar shen kan wanrah noh ia ka Shillong Campus jong ka Captain Williamson Sangma State University ha nongbah Shillong.
U samla Roikupar Synrem u la pynpaw ruh ia ka jingdonkam ban pyrrkhing ia ka bai klas ha ki jaka pule sorkar bad ha ki jaka pule riewshimet, u la ong ba ka seng ka ai jingiaroh ia ka jingshakri ka sorkar ban kyntiew ia ka pule puthi hapoh ka jylla hynrei ym dei ruh ban klet ba ka la donkam ban don da ki aiñ ban pyrkhing ia ka jingrem palat ka bai klas ban pynthikna ba baroh kin ioh lad ban leit klas. Ka jingpule dei ban ioh lut da baroh ki samla bad dei namar kane donkam ban don da ki kynja aiñ ban pyrkhing ia ka jingrem palat ka bai klas.
Ka HYC ka kyntu ruh ia ka sorkar ban ai jingkyrshan da ka song pisa na ka bynta ki jaka pule ha baroh kawei ka jylla ban pyntreikam ia ka National Education Policy (NEP) 2020. U la ong ba, ngi kyntu iaka sorkar ban iarap ia ki jaka pule na ka bynta ban pynshlur ia ki samla ban bteng ia ki jingpule bad ha ka kajuh ka por ban pyllait ia ki kmie ki kpa ha ka jingshah ram bad ban pynthikna ba ka jingpyntreikam ia ka NEP ka iaid beit iaid ryntih la ong u samla Roikupar Synrem.
Nalor kane u general secretary ka HYC ula ong ba ka Council ka la dawa na u myntri ban shim ia ki sienjam haba iadei ban buh da ki jaka thoh eksamin lane ki CUET centres ha baroh ki district ka jylla. Haduh mynta ki samla pule ka Meghalaya ki shem jingeh haba iadei bad ki jaka thoh eksamin namar bun ki samla ki hap ban thoh eksamin sha bar ka jylla.
Ula kyntu iaka sorkar ban sdang noh iaka tnat pule Aptitude and Logical Reasoning kum kawei ka tnat pule naduh ki skul. Nalor kane ka HYC kala kyntu ruh iaka sorkar jylla ban wad lad kumno ban iarap ia kumba 200 ngut ki samla pule kiba pule sha Manipur ban bteng biang iaki jingpule jong ki.
U samla Roykupar u la ong ba ka jingiakynnad ha Manipur kam shym la iohi ban poi shaka jingkut bad ki don kumba 200 ngut ki samla pule kiba pule ha kane ka jylla bad kane ka jingiakynnad ha kane ka jylla kan wanrah ka jingktah iaka lawei ki samla pule.
Ki la duh ia ki snem pule kumba 3 bnai tam. Dei namar kane ngi la kyntu iaka sorkar ban shim ki sienjam ban iarap ia ki samla pule ban ioh bteng biang iala ki jingpule katkum ka jingdon ki tnat pule hapoh ka jylla lane sha kiwei pat ki jylla naka bynta ban pynthikna ba ka lawei ki samla pule kiba pule ha Manipur kim dei ban shah ktah. la ong u samla Roikupar Synrem.
