Shillong, Nailar 10: Mynta ka sngi u Lat ka jylla u Phagu Chauhan mynta ka sngi u la ia shim bynta ha ka jingrakhe ia ka jingdap lai snem jong ka kynhun ki seng niam ka “Shillong All Faith Forum” (SAFF) ha ka jingialang kaba la long ha Bianchi Memorial Hall, Lachumiere, Shillong.
Haba kren kum u kongsan ha kane ka jingrakhe ia ka jingdap lai snem ka SAFF, u Lat ka jylla u la ai ka jingiaroh ba la lah ban pynwan dur ia kun kane ka kynhun ha kaba baroh ki nongialam jong ki niam bapher bapher ki ia don lang ha kawei ban wanrah ia ka jingialong kawei bad ka jingsngewthuh ia ka mariang.
U Lat ka jylla u la ai ka jingiaroh ia ka phang kaba la buh ban ia kren “ Ka jingsuk, jingialang kawei, ka mariang” kine ki don ka jingiadei bad ka niam bad u khun bynriew kine ki long kiba kongsan ha ka long briew man briew.
U Lat ka jylla u la pynkynmaw ba ha kane ka jingioh long ka Ri India ban bat ia ka kam “G20 Presidency” bad ka phang pdeng ka long “ Kawei ka pyrthei, kawei ka iing ka sem bad kawei ka Lawei” ka jingdon ia kum kane ka kynhun SAFF ka long kaba don kam namar ki kren ia ka jingsuk, jingshisha, bad burom ia ka long briew man briew.
La kdew ruh ba ka jingsngewthuh ia ka mariang kaba long kaba don kam namar ka pyrthei ka dei kum ka kmie bad ka long kaba don kam ban niew burom ia ka da ka jingieit, u la kyntu ia ki nongialam niam ba kin pynphriang ia ka khubor jong ka jingieit, ka jingsuk bad ban pynneh ia ka mariang.
U Lat ka jylla pynpaw ia ka jingkyrmen ba ka SAFF kan dang iai bteng ban wanrah ia ka jingsuk , ka jingialang kawei bad ban shim ia bynta ban ialam kumno ban pynneh pynsah ia ka mariang, ha kane ka sngi baroh ki nongialam niam kila don lang bad la pynkut da ka jingrwai na ki kynhun niam bapher bapher.
