Shillong, Nailar 11: Ka KSU EJHDU kum shi bynta ban iakhun ia u drok uba lah kynrei bha ha ka district bad ka jylla hi baroh kawei haka 11 Nailar 2023 ka la shi ia ka sienjam ban mih sha khmat bad ruh ban ai ka kti kamon ka kti kadiang ban jynrar ia une u jingpang ba la bam pong iaki khun samla ka thain bad ka jylla hi baroh kawei.
Ka seng ka la leit ban buh da ka shithi jingai jingmut sha u Deputy Commissioner ka District halor kumno ban iada iaki hep ki barit bad ruh ki samla na une u jingsniew.
Kumba la iohi ba ka EJHD ka dei kawei naki district ba jur bha ka jingkynrei bad jingwan u drok ha kaba lah pynbna da ka sorkar jylla lyngba ka tnat Social welfare ka sorkar jylla.
Ka seng haba ia kynduh ia u DC ka la ai jingmut ba ki school kin dei kiwei ki ba hap ban ban bha ban ai iaki awareness namar ba ki heprit bad ki samla ki ban sa khe san kin lah ban kiar na une u jingdih.
Ka seng ka la ai jingmut ba na ka liang u DC yn khot da ka jingialang na baroh ki ban ia trei lang (Stakeholder) ban iamir bad ba iaid sha khmat halor kane. Ka seng ka la ai jingmut ruh ba yn sdang noh iaki awareness program ha man la ki skul kiba don hapoh ka district ha ka por ba don iaki assembly man ka step bad ban leh iaki awareness program ha katei ka por.
Shuh shuh ka seng ka la ai kyntu ba yn pynkhlain shuh iaki bor pahara bad ruh ba ka police department kan ia trei ryngkat bad ki seng samla shnong ki dorbar shnong bad kumta ter ter ban pynduh ia une u jingsniew.
Na ka liang u DC u la pdiang ba yn iatreilang bad shem yn sa wad shuh ki lad ki lynti kumno ban iada ia ki khun samla na une u jingdih. La ioh ruh ban ia kren ba na ka liang ka seng kan sa iakren ruh bad ki dorbar shnong bad ruh ban jied ia ki shnong ban wanrah iaka Community Gym kaba long shi bynta ka seinjam ban ialeh ban iakhun ia une u jingdih.
Ka Community Gym kan long ba ym don ki gym equipment ha man ki shnong bad iakine yn sa iakren bad ki sports club jong kito ki shnong ban wad iaka iing bad jaka ban buh iakine. Kane ka seinjam kan iarap iaki khun samla ban pynleit jingmut ha ka ba kilan met bad ban pynklet iaki na ki jingsniew ba bun rukom.
Ka Seng ka la ai jingmut ruh ban buh ki “de addiction aftercare rehabilitation centre” bad iakane iaka jaka ka seng kan sa shimti ban wad bad ruh ban pyn sgewthuh sha ka shnong ban pdiang iaka ban buh iakane ka ‘de addiction aftercare centre’.
Ka seng ka kyntu ruh ba ki paidbah kin iatreilang ryngkat bad ka sorkar bad ka seng ban rat dyngkhong ia une u jingdih ba sniew bad ruh ban ym khim jingmut ne tieng haba wan ka jingbha bad jingkylla.
Khatduh khatwai ka seng ka kyntu ruh iaka sorkar ban pynleit jingmut lem halor kane ka mat bad ruh ban pynsted ha kaba pyntrei iaka Drug Reduction Elimination and Action Mission (DREAM) draft policy.
