Shillong, Nailar 11: U president ka seng Shooting Association of Meghalaya (SAM) u bah John Kharshiiing u l ong ba kin ioh ia ka jaka hikai siat suloi da ka jingwan jong ka National Games ka ban sa long ha kane ka jylla ha kine ki snem ban wan.
Haba kren ha ki lat pathai khubor ia ka jingpynkhreh ia ka jingiakop siat suloi kaba la tip kum ka “10th North East Zone Shooting Championship 2023, ka ban sdang ha ka 20 bad kan kut ha ka 27 tarik mynta u bnai ha Shillong, la ong ba ia mynta ka jylla kam pat don ia kane ka jaka hikai siat suloi.
Ka jingiakren bad ka sorkar kala dang iaid namar ban don ia kane ka jaka hikai siat suloi ka jinglut kaba bun bad don kam ruh ia ka jaka kaba heh haduh 25 akar ei ei ka jaka bad da ka jingpynkhreh ban piang ia ka National Games ki khmih lynti ban ioh ia ka jaka siat suloi. Ia mynta la pyndon kam ia ka jaka jong ki shipai Assam Riffle.
La iathuh ba kane ka jingiakop siat suloi ka long ka sien kaba ar kaba la pynlong ha kane ka jylla namar ia kane ka jingialeh la pynlong man u snem tang ki pynlogn na kawei ka jylla sha kawei ka jylla, ki ban ia shim bynta ki don 6 tylli ki jylla bad la khmih lynti kiban ia shim bynta ki don kumba 260 ngut ei ei. Na Meghalaya ki don 25 ngut.
Ka jylla Sikkim kim lah ban ia shim bynta namar ba kimd on ia ka seng, katba ka jylla Tripura kim don ia ki nongsiat ki shu shim na sha bar, ha kaba ka National Riffle Association of India (NRAI), la ong ban ioh ban ia shim bynta ha kine ki jingiakop ki don ki kyndon ym baroh ki ban ioh ia shim bynta.
Ia kane ka jingiakop yn peit da ka NRAI bad ka SAM kan long tang ka nongpynkhreh, ki jingiakop siat ki don 50 tylli, kiba 10 meter, 25 meter bad 50meter, kin don 10 ngut ki briew ki ban wan na ka NRAI ban pyniaid ia kane ka jingiakop,.
Ia mynta ka jylla kam don ia ki briew ban pyniaid, kis aw ngut kiba la shah hikai ha ka NRAI kin dang hap ban pyntbit shuh shuh, kito ki long u Davis N R Marak, Kong Balarishisha Rani, Anjalee Singh bad John Thangjam. Ha kane ka sngi la don lang ki nongkit kam ka seng bad la pynlait ruh ia ka dur jong ka jingialehkai ha kane ka sngi.
