Shillong, Nailar 13: Ka long ka ba donkam ban sot na ki ktien shnong na kylleng ki thaiñ bad kyntoit shnong khnang ban pynriewspah ia ka ktien Khasi bad ban kdup shitylli ia baroh ki ktien ha kawei ka ktien pdeng.
Nalor kita ki ktien ba la don lypa na ki kylleng ki kyntoit shnong ki don ruh ki ktien ba lah ban shna thymmai da ka ba synrop lang ar ne lai kyntien ban shna kawei ka ktien ka ba kit jingmut, ka ba thiang snah bad ka ba lyngkot katlah katiai khnang ban bit ban biang ka thoh ka tar.
Kine harum la jer kum kat kum ba la pyrshang ban pynwandur ha ka ba dang dei ban tuklar da ka iktiar ba pura halor ka ktien:
Diplomat: ka mut simpah simsong– simpah simsong ka dei ka ktien pharshi ka ba phalang їa ka jinglong jong u briew u ba pnah ktien bad u ba lah ban kyrsoi їa ka snap pynbha ha ka jingїadei parabynriew.
Director: ka mut lamkynto– lam ka dei ba tur nakhmat; kynto ka dei їa ka ba ne uba hukum kam їa kiwei ki ba kham hapoh ka kyrdan. Kumta uba tur ha khmat ban hukum kam їa kiwei ka kit jingmut їa ka ktien director.
Discipline: ka mut pyrkhing jinglong, syndong akor, adkar– pyrkhing ka dei ba teh kyndon bad jinglong ka dei ka snap shimet jong u briew ha ka їaid ka їeng ha la rympei ne ha ka imlang sahlang; syndong ka dei ba kiar na ka ba ngat ha kano kano ka bym bit bad akor ka dei ka snap jong ka longbriew manbriew ban tipbriew tipblei, adkar ka dei ban kiar na kiei kiei ki bym bit bad ban leh tyngkan їa kano kano ka ba ym lah ban kiar.
Discuss: ka mut syllok, mir jingmut, thirnïa, їathir ïathaiñ– syllok ka dei ba pyni nia mar kylliang lada tang hapdeng arngut ne ha ka kynhun; mir jingmut ka dei ba їa pyninia ha ka kynhun ne ka lympung; thirnia ka dei ba wad nia kham bniah ban shem ka nia ba biang; їathir ïathaiñ ka dei ba kham jlan ka їa pyninia ha lympung ne dorbar.
Efficient: ka mut tbit- tbit ka dei ba pnah ban trei kumba thmu bad shah la ka kam ba don sap.
Effigy: ka mut theng theng– theng theng u dei u kynja tiar ba shna ne thaw tang ban dep uba pynsyryiem bad ki briew ne ki mar ki mata.
Economy: ka mut seispah, ka ïoh ka kot– sei ka dei ba pynmih shabar bad spah dei ka jingdon jingem; ka ïoh ka kot ka dei ka ba kamai pisa ban im ban bsa їalade, їa ka longїing bad їa ka imlang sahlang.
Ego: ka mut hanga-manga, hangamei, malade– hanga-manga ka dei ba kam trai halade їa kaei kaei baroh ka ba don bad ka ba leh; hangamei ka dei ba meng ba kyreit tang їalade; malade ka dei ka ba sarong shitrhem thik tang halade.
Engineer: ka mut karikor- karikor ka dei їa u briew uba tbit ban trei da ka bor jong ka kor.
Enterprise: ka mut kheng– kheng ka dei ba bei tyngka ban seng khaїi.
Entertainment: ka mut byrngia- byrngia ka dei ba myllen tang da da ka rong ka taw ban rkhie kmen khlem kano kano ka snap ban pyrkhat jylliew ne diaw.
Entire: ka mut shityllup- shityllup ka dei ba kdup naphang ha kawei ka thup.
Entrepreneur: ka mut u nongkheng kheiñduh- nongkheng kheiñduh dei u nongseng khaїi uba da thew shwa ban kheiñduh ha ka ba bei tyngka ban seng khaїi.
Envelop: ka mut ka soplup– sop dei ka jingsong ba la spaiñ bad lup dei ka ba tap ban ym paw shabar.
Environment: ka mut meimariang, mariang– mei dei ka ba khot ieit їa ka kmie bad mariang dei ka sawkun ki jingthung jingtep, ka khyndew ka shyiap, u mawlong mawteh.
Examine: ka mut thohsani- thoh ka dei ba thaw ba shna eiei da ka ba pruid dak bad sani ka dei ba bniah thik pa thik haduh ban da janai paka.
Exercise: ka mut kilan- kilan ka mut ba pynkhih la ka met ka phad ban pynim ki dohksah bad їaid ryntih ka snam ka ksuit ha ka met.
Exhibition: ka mut pyninam- pyni ka dei ba buh haba shynna paidbah bad nam ka dei ka burom baphuh baphieng.
Exposition: ka mut pynirong– pyni ka dei ba buh haba shynna paidbah bad rong ka dei ka lat ka tamasa byrngia.
Expunge: ka mut pyndam, khiar- pyndam ka dei ba ñiad pynjah noh їa ka ba paw bad khiar ka dei ba pruid lyngba їa ka ba paw ban pynjah noh.
Exchequer, Treasury: ka mut tyngkari, pisajylla- tyngka ka dei ka mar ba don dor ka ba lah ban їapeiñ bad ka tiar ka tar bad ri ka dei ka Bri ka bsah ka Ri ka Raij; pisa ka dei ka mar ba don dor ka ba lah ban їapeiñ bad ka tiar ka tar bad jylla ka dei ka jaka hapoh u pud sawdong ba kynthup їa ki hima, ki raij bad ki shnong.
Excommunication: ka mut ryngkang par, jylla kharit- ryngkang ka dei ba kynthih na kawei ka jaka sha kawei pat ka jaka bad par ka dei ba їaid bad kti bad kjat ban phet rieh; jylla ka dei ka jaka sawdong pud ki hima, ki raij bad ki shnong bad kharit dei ki dohkha ba duna jingheh ban їa kiwei kiwei ki ba jyllei ha um. Kumta baroh ar tylli ki ktien ki dei ki ‘tiensiat ‘tienpharshi ki ba kit jingmut ba shah beh shnong na ka imlang sahlang.
Ka ryngkang par ka long kumba pynїasyryiem bad ki mrad barit ki ba shah kthong ha ki mrad heh ha khlaw; bad ka jylla kharit ka long kumba shah kyntait sharud ki dohkha rit ha ki dohkha heh ha wah ne ha pung.
Exile: ka mut ryngkang par, jylla kharit; hynrei ka dei ka ba phet hi da la ka mon ym ka ba shah beh ne shah kthong hano hano.
