New Delhi. Nailar 13: Katkum ka Economic Survey 2022-23, kumba 65% jong ki briew ka ri ki sah ha ki jaka nongkyndong bad 47% jong ki briew ki shaniah ha ka rep ka riang ban kamai jakpoh. Ka kam rep ka dei kaba shong ha ka por bad ka donkam ia ki kam ha ka por kaba biang ban pynthikna ka jingseisoh.
Ki mar kiba pyndonkam ha ki kam rep ki long kiba donkam bha ha ki kam rep bad ka jingpynbiang ia kine bad ki jingshakri bapher bapher ki long kiba kongsan ha ka jingkyntiew ia ka ioh ka kot na ka kam rep.
Ha India, ka rynsan jong ki jingshakri ban pynbiang ia kine ki jingdonkam ka long kaba bun bynta bad ki don ki rynsan bapher bapher na ka bynta ki symbai, ki dawai sboh, ki dawai khniang bad ki tiar rep kiba kyntiew ia la ki jingdonkam.
Shuh shuh, ka jingdonkam ia ka jingtest ia ka khyndew, ki symbai, ki dawai sboh bad ki jingtip shaphang ki skhim bapher bapher kiba iadei bad ki nongrep ki poi sha ki nongrep lyngba ki kynhun bapher bapher ha ka rukom ka bym iaid ryntih. Kane ka rukom treikam kam lah ban pynbiang ia ka jingtip sha ki nongrep khnang ba kin lah ban shim ia ki rai kiba dei.
Ka jingpynbeit ia kane ka shong ha ka jingpynbiang ia kawei ka rukom pynbeit ia ki nongrep hapoh kawei ka kynhun kaba kyrshan da ka Sorkar ba ki nongrep ki lah ban shaniah bad bud. Mynshuwa ki kam shimet ki la pyrshang ban pynbud ia ki jaka pdeng na ka bynta ki jingdonkam jong ki nongrep bad ai jingshakri ia ki hynrei kiba bun na kine kim shym la urlong.
Kumta ka la mih ka jingpyrkhat ban pynkylla ia ki dukan dawai sboh ba la don lypa ba ki nongrep ki ju leit bha sha ki Pradhan Mantri Kisan Samriddhi Kendra (PMKSK), kawei ka jaka pdeng khnang ban pynbiang ia ki jingdonkam jong ki nongrep.
Kane ka prokram ba la sdang da ka Sorkar Modi ka la wanrah ia ka jingkylla ha ki kam rep jong ka India. Da ka jingthmu ban pynkup bor ia ki nongrep bad kyntiew ia ka roi ka par ha ki kam rep, ki sienjam hapoh kane ka prokram ka pyrshang ban pynsuk ia ka jingioh ia ki tiar rep, ka jingtip bad ki jingai jingshakri kiba kyntiew ia ka jingim jong ki nongrep bad kaba kyntiew ruh ia ka roi ka par jong ka ri.
Hapoh ka prokram PMKSK, kumba 2, 80,000 tylli ki dukan dawai sboh ki dang shah pynkylla sha ki jaka pdeng na ka bynta ki nongrep. Ka PMKSK ka peit bniah ia ka jingpynbiang ia ki jingshakri bad ki tiar kum ki dawai sboh,ki symbai, ki dawai khniang, ki kor bapher bapher bad ka jingpyndonkam ia ki drone ban synreit dawai sboh bad dawai khniang.
Kawei na ki bynta ba kyrpang jong ka PMKSK ka dei ka jingpynbiang ia ka lad ban test ia ka khyndew bad ki symbai. Da kaba ai jingtip ia ki nongrep shaphang ka jinglong jong ka khyndew bad ki symbai, kine ki jingshakri ki ai jingtip khnang ba ki nongrep kin lah ban shim ia ki rai kiba dei, ka jingpyndonkam ia ki tiar kiba iahap bad ka jingseisoh kaba kham biang.
Kane ka kyntiew ia ki kam rep kiba bha. Kumjuh ki PMKSK ki long ki jaka pdeng ban ioh jingtip, ban iasam jingtip shaphang ki mar rep bad ki skhim Sorkar. Kine ki jaka ki pynkup bor ia ki million ngut ki nongrep. Kane ka sienjam kan pynthikna ia ka jingseisoh ki jaka rep bad ka kamai kajih kaba bha ia ki nongrep.
Ka jinthmu ka dei ban pynsuk ia ka jingim jong ki nongrep. Ki jingjia ba dang shen ki pyni ia ka jingjop jong ka Pradhan Mantri Kisan Samriddhi Kendra. Ha ka prokram ‘PM-Kisan Sammelan’ ba la long ha Sikar, Rajasthan ha ka 27 tarik u Naitung, 2023, u Myntri Rangbah Duh u la aiti 1, 25,000 tylli ki PMKSK sha ka ri. Ka jingiashim bynta jan 2 klur ki nongrep ka pyni ia ka jinghun ki briew ia kane ka sienjam.
Lah ban sngewthuh ruh ia ka jingjop jong kane ka prokram lyngba ka jingiatylli bad ka jinghun jong kito kiba don bynta ha kine ki kam. Ka khana samari ba dang shen ka la pyni ba ka jingdon ki nongrep kiba leit sha kine ki centre ka la kiew 15- 20% bad ba ki kmen shaphang ki jingkylla naduh ka jinglong jong ki PMKSK haduh ki jingshakri ba lah ban ioh na kine ki jaka.
Ka jingdie ia u nano urea ruh ka la poi sha ka T 6 klur lyngba kine ki PMKSK. Ki nongseng kam lajong ha ki kam drone kiba ioh jingkyrshan na ki kompani dawai sboh ki dang iasoh bad ki PMKSK ban kyntiew ia ka jingsynreit ia ki dawai sboh ha ka rukom kaba kham bha. Ka jingiasoh kaba kham bha hapdeng ki jylla, ki KVK, ki nongdie mar ka la wanrah ia ka jingjop ha ka jingai jingtip bad ka jingai jingshakri ia ki nongrep.
Kumta, ka sienjam PMKSK ka la don ka bynta kaba khraw ha ka jingpynkupbor ia ki nongrep bad ka jingpynkhlain ia u budlum jong ka ioh ka kot ka ri. Da kaba pynsuk ban ioh ia ki tiar, ka jingtip bad ki jingshakri ha ki kam rep, ka jingpynkupbor ia ki nongrep da ka teknoloji ba thymmai bad ka jingpynshlur ia ki kam kiba bha, ki PMKSK ki dang wanrah ia ka juk jong ka jingriewspah ia ki nongrep.
Lyngba ka jingkyrshan kaba skhem na ka Sorkar bad kito kiba don bynta ha kine ki kam, ki PMKSK ki dang bteng ban wanrah ia ka jingkylla kaba bha, ka jingpynkhlain ia ki kam rep bad kin dang don bynta ka jingtei ia ki kam rep kiba lah ban kyrshan ialade.
