New Delhi, Nailar 15: U Myntri Rangbah Duh, u Narendra Modi ha ka jingai jingkren jong u na Red Fort ha ka lyngkhuhsngi ioh jinglaitluid ka ri kaba 77 mynta ka sngi u la ong ba ka India ka don lang bad ki briew jong ka Manipur bad u la ong ba u ngeit skhem ba ka jingpynbeit ia ki jingeh ha kane ka jaka shen kan sa urlong.
U la ong ba ka la don ka por jong ka jingkulmar bad ka jingiaumsnam ha Manipur bad ki khubor jong ki jingiuhroitia ka burom jong ki longkmie.
U la ong ba ki briew jong ka Manipur ki la pynthikna ia ka shongsukshongsain la katto katne por mynta bad u la kyntu ban iaidshakhmat ha ka kam ban wanrah biang ia ka shongsukshongsain kaba neh.
“Ka Sorkar Jylla bad ka Sorkar Pdeng ki dang iatrei lang ban pynbeit ia ki jingeh bad kin dang bteng ban leh ia kane,” u la ong.
“Ka India ha kine ki snem ba la dep ka la ioh ia ka bor kaba thymmai bad mynta ki jakakhappud ki dei kiba la kham shngain,” la ong u Myntri Rangbah Duh, u Narendra Modi ha ka jingai jingkren jong u sha ka ri na ka Red Fort, Delhi ha ka lyngkhuh sngi ioh jinglaitluid kaba 77 ha ka 15 tarik u Nailar, 2023.
U la kren shaphang ka jingkut jingmut ka Sorkar ban pynthikna ia ka jingshngain jong ka ri hapdeng ki jingeh ha ka jingiadei hapdeng kiwei kiwei ki ri bad u la ong ba ki jingpynkylla ki iadei bad ki kam pahara ban pynthymmai ia ki kynhun pahara bad pynthikna ia ka jingdon ki samla kiba la khreh ban iakhun pyrshah ki jingeh kiba lah ban wan.
U Myntri Rangbah Duh u la ong ruh ba ki briew jong ka ri ki sngew shngain mynta namar ki jingjiapyntriem jong ki nongkiengatiar ki la duna bha mynta. Haba ka ri ka long kaba shongsukshongsain, ngi lah ban pynurlong ia ki thong kiba thymmai, u la ong.
U Myntri Rangbah Duh u la kren ruh shaphang ka skhim One Rank One Pension, ka jingdawa kaba la sah tengna kito kiba la shongthait na ki kam pahara bad u la ong ba ka Sorkar Modi ka la pyntreikam ia kane mar syn wan ha ka bor.
“Ka OROP ka dei ka jingburom ia ki shipai jong ka ri jong ngi. Ngi la pyntreikam ia ka mar syn wan ha ka bor. La pynpoi T. 70,000 klur sha kito kiba la shongthait na ki kam pahara bad kibahaiing jong ki mynta,” u la ong.
U Myntri Rangbah Duh u la ai khublei Sngi Ioh Jinglaitluid sha ki dkhot jong ki kynhun pahara kiba don ha ki jaka khappud kiba pynthikna ba ka ri ka long kaba shngain bad kiba iada ia ka bha ka miat jong ka India.
