Shillong, Nailar 16: U Myntri ba peit ka kam Jngohkai Bah Paul Lyngdoh ha ryngkat u Myntri Rangbah ka jylla u Conrad K Sangma, mynta ka sngi ki la plie paidbah ia ki jingtei jong ka kam jngohkai ba la jer kyrteng “Travellers Nest” ha ka shnong Kyiem, Mawphlang, East Khasi Hills.
Kane ka Travellers Nest ka don haduh 5 tylli ki cottage ryngkat ka restaurant ban pynbiang ia ki jingdonkam ki nongwan shangkai pyrthei. Ka Mawphlang ka dei kaba la bna nam halor ka jingdon ia ka khlaw kyntang bad ka dei ruh kawei ka jaka jngohkai kaba la khring bha ia ki briew ba nabar ka Jylla.
Ka jngai kumba 28 km na Shillong.Ia kane ka project “Travellers Nest” project ha Kyiem la bei tyngka da ka Meghalaya Age Limited (MAL) lyngba ka Meghalaya Rural Tourism Cooperative Federation Ltd, kaba la kot haduh T.94 lak.
Ka jingplie ia kine ki jingtei ka dei ka ba kongsan ha ka jingpyrshang jong ka Sorkar ban pynkhlaiñ ia ka jingiatrei lang ki Shnong ki Thaw ha ha ban kyntiew ia ki kam jngohkai pyrthei.Haba plie ia kine ki jingtei, u Myntri Rangbah u la banjur halor ka jingkongsan ban iashimbynta ki shnong ki thaw ha ka ban kyntiew ia ka ioh ka kot jong ka Jylla.
Haba kren halor ka jingkitkhlieh lang jong baroh ki kynhun kynthup ka Sorkar, ki Shnong ki Thaw bad ki Nongshongshnong, ula ong, Ka Meghalaya kan ym lah ban kynjoh ia ka jingkiew shakhmat tang da ka jingtrei ka Sorkar. Baroh ki kynhun ki don ia la ka bynta ban leh bad ban ithuh ia kine ki bynta haba buh ia ka thong hakhmat eh ha ka jingmut jingpyrkhat ka long kaba kongsan eh.
Halor ki kam jngohkai, u Conrad K Sangma u la pynpaw ia ka jingkyrmen jong ka lawei halor ki bynta bala shim kum ka “Travellers Nest”. U Myntri Rangbah u la kren ruh halor ka program ba dang shu pyllait thymmai-ka CM-ELEVATE programme kaba tyrwa ban ai subsidy naduh 30% haduh 75% ia ki project ba thmu ban pyntrei da ki nongsengkam lajong, ki Self Help Group bad kiwei kiwei ki kynhun.
Ka thong jong ka program ka long ban pynkhlain ia ka ioh ka kot lyngba ki sienjam bapher bapher ba kynthup naduh ki cinema hall sha ki health club bad ki project kam jngohkai.
u Conrad u la ong ba ka jingshna pynbha ia ka surok na Mawphlang sha Weiloi ka dei ka jingai sakhi jong ka Sorkar halor ka jingkut jingmut ban buh hakhmat eh ia ka kam ban pynkhlain ia ki lad pyniasoh lyngba ki surok hapoh ka Jylla.
