Shillong, Nailar 24: Hadien ba la ioh ka jingmynjur na u lad ka jylla ia ka Khasi Hills District Autonomous Establishment Management and Control of Market 2rd Amendment, Regulation act 2021.
Mytna ka sngi ki nongialam jong ka Hill Farmer Unions HFU ki la leit ban ia kynduh ia u CEM bah Pyniaid Syiem bad ka EM jong ka Market ka kong Grace Marry Kharpuri.
Khlem da klet ruh ia u CEM ba rim ka KHADC u bah Titosstarwell Chyne. Ban ai khublei kyrpang halor ka jingioh jong ki ia kane ka aiñ kaba kyrpang na ka bynta ki nongrep.
Haba iakren bad u President ka HFU u bah Commander Shangpliang u la ong ba, kane ka jingdon noh kane ka aiñ ot kilo kan nym dei ban don ka jingiapher hapdeng ki nongrep bad ki nongkhaiï.
Namar ki nongkhaii ruh khlem ki nongrep kim lah ban pyniaid ia ka kam kumjuh ruh ki jongrep khlem ki nongkhaii. U la iathuh ruh ba ha kane ka aiñ kaba sngewtynnad ka long ba ha kane ka aiñ la bsuh ruh ia ka minimum price.
Ha kajuh ka por haba iadei bad kane ka aiñ ka kong Grace Marry Kharpuri ka la ong ba kane ka jingdon jong kane ka aiñ kan nym dei ka jingleh shilliang iano iano. Hynrei ban iadon ka jingiasngewthuh jingmut hapdeng ki nongkhaii bad ki nongrep bad lyngba jong kane yn lah ban iatreilang.
Ia ka Khasi Hills District Autonomous Establishment Management and Control of Market 2rd Amendment, Regulation act 2021. La pdiang ha ka ing ha ka budget bnai March, ha ka por ba long CEM u Bah Titosstarwell Chyne bad kum ka EM incharge Market kong Grace Marry Kharpuri.
U bah Titostarwell Chyne haba kren haba iadei bad kane ka bill u la ong ba balei la wanrah ia ka, ka daw ka long ba ka don ka jingiakhih jong ki nongrep naduh ki por ba kham mynshuwa. Ha kaba wat ki Minister sorkar ki la leit hiar hi ha iewduh na ka bynta ban ia pynbeit ia kane ka ishu kaba iadei bad ka jingot kilo.
U bah Titostarwell Chyne u la kubur ba ha ki por ba la dep ki EC ki la ialeh ban ai jingpynbna ba ymdei ban ot kilo. Hynrei la da khlem don hi da ka aiñ, ban shu ai notification katno katno ruh kan nym treikam.
Halor kane u la ong ba kum ka EC ha Kato ka por ka la sngewdei ban wanrah da ka aiñ. Ka mut lah ban implementat. Lah ban pynshitom ia ki ba pynkheiñ lane ba pyndonkam bakla ia kata ka aiñ.
U la kynthoh ruh ba ka jingslem ban ioh ka jingmynjur ia kane ka aiñ kam dei na u lad ka jylla hynrei ka dei na ki tnad jongka sorkar da kaba aidaw ba dang examine bad study ia ka, kat haduh ba ka shimpor da ki snem, kaba kane ka jingleh ka pyni ba kim khein snep ia ki bill ba la phah na ka KHADC.
