Shillong, Nailar 26: Ka Synjuk Ki Rangbah Kur Ka Bri U Hynñiewtrep ka la pynskhem ia ka seng shnat ha South West Khasi Hills, Mawkyrwat. Ha ka dorbar ba la pynlong mynta ka sngi 26tarik Nailar, 2023.
Palat spah ngut ki rangbah kur na South West Khasi Hills ki la ia poi ban sakhi ia ka jingpynskhem ia ki nongkitkam jong ka shnat da u Bah R L Kharpran, Symbud Khliehduh ha ka ba la ia don lang ki rangbahkur ka seng kmie ba kynthup ia u Bah Erwin K Syiemsutnga, Aristotle Lyngdoh, Kynsai Syiem, Ialamlin Lyngdoh, Raphael Warjri bad kiwei kiwei.
La kren pdiang da u Bah Mansturdy Nongrem ba la shah jied kum u khliehduh ka shnat South West Khasi Hills ha ryngkat bad phra ngut kiwei pat ki nongkitkam ba kynthup ia u Bah Wallambok Syiemiong, Symbud Khliehduh, B. Ioannis Shylla, Saiñpyniar bad kiwei kiwei.
Ka jingiatai ha katei ka sngi la lamkhmat da u Bah Aristotle bad bah Erwin K Syiem Sutnga ha ka ba ki la kren mardor halor ka jingdonkam ban pynneh pynsah ia ka riti kheiñkur kheiñkha na ka kmie bad kiwei kiwei ki riti dustur tynrai ba la dep shna pura kum ki aiñrew ha ka Dorbar Dalariti Rilum Khasi (Khasi Hills Autonomous District Council). Kumta ki la ban jur halor ka jingdonkam ban pynlong aiñ pura noh kham kloi khnang ban iada ia ki hok jong ki khun ki hajar Khasi jong ka jylla.
Ki mat ba kham kongsan ba la iakren da baroh ki rangbah kur ka long halor ka aiñrew jong ki kur ne ka Clan Administration Bill, ki aiñ na ka Dorbar Thawaiñ Ri India ki ba kynthup ia ka Forest and Environment Amendment Act, ka Uniform Civil Code bad kiwei kiwei ki aiñ ki ba lah ban long kum ki atiar ban iuhroit ia ka thaiñ shatei lammihngi jong ka Ri India ka ba thew pyrshah ia ki riewlum kynthup ia ka Rilum Khasi.
La pynkynmaw ba ka aiñ khang pom dieng ha u snem 1996 ka la pynsyrtok bad la hiran palat liam ka thaiñ West Khasi Hills baroh kawei, u Bah Erwin u la maham ba kane ka aiñ ba mynta ka thew syndon ba ka sorkar kmie kan kam trai ia ki khlaw ki ba bun kynthup ruh ia ki jaka shrah ki ba khlem don ba rep ba riang.
Ha ka ba sdang u Bah Wallambok Syiemiong u la jer shibun tylli ki kyndon ba dei ban pynlong aiñ ha ka Dorbar Dalariti ka ba kynthup ruh ia ki mat kongsan kum ka iakajia pud jylla, ki kam suwari, bad kiwei kiwei ki bynta ki ba dei ban the lakam na ka bynta ban ym shah iuhroit ha ka sorkar jylla ne ha ka sorkar kmie khamtam ia ki hok tynrai jong ki khun ki hajar.
La shim bynta lang kiwei kiwei ki rangbah ha ka jingiatai ha ka ba la mih ka jingkren halor ka tangjait, ka tipkur tipkha lyngba ka riti the sohpet, ka tehkur ka tingkur bad kumjuh ruh ha ki riti hiar pateng ki rikynti ba kynthup lang ia ki nongtymmen bad nongkhynraw.
Ha ka ba kut artat la kren ai khublei da u Bah B Ioannis Shylla, Saiñpyniar ha ka ba la pynkynmaw artat ban dang iai khluh ban pyniar ia ka seng shnat ban kham skhem ka synjuk ha ki kam ban ia da ia la ki hok tynrai jong ki khun ki hajar ha Ri Khasi.
