Shillong, Nailur 06: Ka Estimate Committee jong ka iing dorbar thawain ka jylla ha ka sngi Balang ka la hiar sha West Jaiñtia Hills District ban leit jurip ia ka Residential School kaba don ha ka shnong Sabahmuswang, West Jaiñtia Hills District.
Ia ka Committee la lamkhmat da u shongknor u bah Mayralborn Syiem uba dei ruh u MLA ka Nongpoh u, ha ryngkat ka jingsynranlang u MLA ka Mawkyrwat bah Renikton L Tongkhar, u MLA ka North Shillong Bah Adelbert Nongrum, u MLA ka Jowai Bah Wailadmiki Shylla, u MLA ka Selsella u Arbinstone B. Marak bad ka MLA jong ka Ampati ka Miani D Shira.
Ha kane ka jingleit jurip kane ka kynhun ka la lap ba ka Residential School ka dang donkam shibun ki jingduna kumta la donkam ban pynbha naduh ki jingtei kiba pher bapher bad ha ka juh ka por ki dkhot ki la ailad ruh ïa u Waheh Shnong jong ka Sabahmuswang bad ïa ki trai jaka ba kin pynsngew ïa ki jingeh ha kaba ïadei bad katei ka jaka pule khnang ba yn ïoh ban pynïaid shakhmat ïa ka Residential School.
Hadien kane ka jingleit jurip ïa kitei ki dkhot jong ka MEC la leh burom ha Community Hall jong ka Shnong Sabahmuswang WJHD. La synran lang ïa ki dkhot ka MEC da u Deputy Commissioner jong ka West Jaiñtia Hills u Bah B.S Sohliya, ka District School Education Officer, Jowai ka Kong A P Syiemm nalor ki ophisar ka tnad PWD (Building).
