Shillong, Nailur, 06: Ka North Eastern Hills University Students Union (NEHUSU) ka la aipor shiphew sngi ïa ki bor pynïaid jong ka skulbah NEHU ba kin bishar thymmai noh ïa ka ka rukom khein mark ia ki samla pule ba la pyntreikam hapoh katei ka skul bah.
Ka NEHUSU kala pynpaw ruh ban bteng biang ïa ki jingiakhih kiba tyngeh lada ki bor pynïaid jong kane ka skulbah kim sngap ia kane ka jingdawa. Da ki phew spah ngut ki samla pule jong kane ka skulbah ki la ia shim bynta ha ka jingiaid paidbah na khmat ka Central Library bad pynkut hakhmat ka ophis treikam u Vice Chancellor ka NEHU u Prof. PS Shukla ban pynsngew ïa kane ka jingdawa.
Ki samla pule ki la dawa ia ki bor pyniaid ka NEHU ban shong bishar thymmai ia ka jingai mark ia ki samla pule namar la shem ba kane ka jingai mark ba ai da kane ka skul bah ka dei kaba rit tam haba ïanujor bad kiwei ki skulbah kiba don ha ka Ri.
Ka NEHUSU kala ong ba ka jingioh mark jong ki samla ka kot tang 65-68 % watla ki leh bha katno katno ruh bad kane ka la pynduhnong haduh katta katta ia ki samla pule ba kin dang bteng biang ïa ki jingpule ha ki kyrdan Master ne ban ïoh Scholarship.
Ha kane ka sngi, ki samla Pule ki la dawa ban pynsangeh shwa ia ka result jong ka 2nd Semester kat bym pat pyntreikam ia ka jingaimark bad ban bishar bniah biang ia ka result jong ki Semesters katkum ka Grading System. Ki samla pule ki la dawa ia u Vice Chancellor ba u dei ban hiar shuki namar ka jingmynthi ïa ki jingdawa.
