Shillong, Nailur 13: Ka KSU South West Khasi Hills District ka pynpaw iaka jingsngewnguh bad ka jingkhublei iaka Health Department jongka sorkar jylla khamtam eh ia ka Kong Ampareen Lyngdoh myntri ka tnad ka koit ka khiah halor ka jing shimkhia iaka jingeh ki paitbah ka dong ka thain da kaba ai jingmynjur ban shna iaki ar tylli ki Health Sub Centres hapoh Mawsynram C & RD Block kata ha shnong Mawhiang bad ha Jyllep.
Kum ban shu pynkynmaw , ka jingleit iakynduh ba khatduh jongka seng ia i kong Ampareen Lyngdoh ka dei haka 26 tarik bnai April 2023 ha kaba na kiba bun ki mat ba ngi la rah , ki mat ba iadei bad ka jingbuh iaka Health Sub Centre ha Jyllep bad Mawhiang ki dei kiwei ki mat kiba hakhmat .
Ka seng ka sngewkmen shikatdei eh hadien ba ngi la ioh jingtip ba ka Tnad ka Koit ka khiah jongka jylla ba la khlieh da i Kông Ampareen kum ka Minister myn haka 08/09/2023 ki la shim ia ka rai ban mynjur ban phah Shna noh ia kine ki artylli ki Health Sub Centre . Kum ka seng , ngi khmih lynti ba ka sorkar kan pyndep kloi iaki jingdonkam ban phah Shna noh ia kine ki Sub Centre khnang ba kan long ka jingmyntoi iaki paitbah jongka dong ka thain hi baroh kawei .
Shuh shuh , na ka liang ka KSU South West Khasi Hills District ka kyntu ruh ia I kong Ampareen Lyngdoh Iba dei I Mininster i/c Health and Family Welfare Department ban wan jurip lem ia ki CHC bad PHC ba don ha South West Khasi Hills District bad Mawsynram .
Ka KSU ka kyntu ba i dei ban wan jurip kyrkieh khamtam iaka Civil Hospital ne ka 100 Bedded CHC kaba don ha Mawkyrwat khnang ban lap iaki jingduna hapoh Kane ka Hospital naba ka seng ka la dep rah teng ruh sha i ia ki jingduna ba don hangne .
Kum ka seng ka kyntu ia i ba in wan jurip khnang ban lập ba kane ka Hospital watla ka la kham biang ban ia kaba mynno Mynno hynrei ka dang duna ha baroh ki liang khamtam haka jingdon jongki nongtrei haki post ba donkam khamtam kum ki doctors, ki specialists bad kiwei ki post ba donkam.Kane ka dei ka kyrwoh na u samla Forwardman Nongrem , President KSU SWKHD.
