Shillong, Nailur 20: Ka Dr. Ampareen M Lyngdoh haba jubab ia ka jingkylli jong u bah Ronnie V Lyngdoh MLA na Mylliem, la ong ba kam shymdon ka jingkyrpad na ka tnad ka koit ka khiah jong ka sorkar pdeng ba kin phah sha ka sorkar ban buh ia ka AIIMS hospital ha Meghalaya.
La ong ba ka NEIGRIHMS kala don ha Meghalaya ia kaba la pyniaid da ka tnad ka koit ka khiah jong ka sorkar pdeng lyngba ka ain jong jong ka sorkar pdeng kaba la pdiang hapoh Parliament ha u snem 1987, bad ha Meghalaya la Register hapoh ka Meghalaya Societies Act 1983.
Haba jubb pat ia ki jingkylli bynrap jong u tei u MLA na ka liang jong ka Dr. Ampareen ba dei peit ia ka tnad ka koit ka khiah jong ka jylla, ka la pyntip hapoh ka iing dorbar ba u myntri rangbah un sa thoh sha ka sorkar pdeng bad kin sa bud dien ia kane ban kyntiew ia ka NEIGRIHMS sha ka kydan ka AIIMS.
Ha ia dei bad ki jaka sumar ia kiba la kyrni ha ka jingdih drok ka sorkar kala pynkhreh ban bun san tylli ki jaka sumar, ar tylli ka West Garo HIlls bad lai tylli sha ki lum Khasi ha kaba ka sorkar kan peit ia ki ban pyniaid.
Halor kane u MLA jong ka Mawlai u u bah Brighstarwell Marbaniang la kyntu ia ka sorkar ban buh kawei ka jaka sumar ia ki nongdih drok ha Mawlai namar ka Mawlai ruh kala bun ki nongdih drok.
