Shillong, Nailur 22: U Chief Executive Member barim jong ka Khasi Hills Autonomous District Council uba la kylla long u nongïalam ka liang pyrshah ha Council u la pynpaw ka jingbitar halor ka jingbym ïoh lypa shwa ïa ki mat ïatai ha ka sngi ba sdang ka dorbar kyrpang jong ka KHADC kaba la sdang mynta ka sngi.
Ha kane ka sngi ba sdang ka dorbar kyrpang na ka liang u Bah Titos Chyne uba dei u nongïalam ka liang pyrshah, mar ïa sdang ka dorbar u la ïeng ban knieh ktien bad pynpaw ka jingbitar namar ka jingbym ïoh lypa ïa ki mat ki ban ïa kren ha kane ka dorbar kyrpang.
“Ngin ïa shim bynta kumno ha kane ka dorbar ba kyrpang namar ba nga tang hapoh 20 minit shwa ban sdang ka dorbar kyrpang, nga dang ïoh pdiang ïa ki mat ban ïathir hapoh dorbar” ong u Bah Titos.
Shuh shuh u Bah Titos u la ong, “Katkum ki rule ar sngi shwa ban sdang ka dorbar la dei ban pynpoi lut sha baroh ki dkhot jong ka Council”.
Na ka liang u Bah Titos u la pynpaw ba la kumno kumno lai taïew la ïoh lypa ïa ka jingpynbna halor ka dorbar kyrpang bad lada ïoh pdiang tang mynnin ruh ka biang, hynrei kumno ngin ïatai haba khlem ïoh ïa ki mat ïa kren.
Na ka liang u Deputy Chief Executive Member ka KHADC haba pynshai halor kane, u Bah Pynshngain N Syiem u la pynpaw ba namar ka jingkyrkieh jong ka kam ym shym la lah ban pynpoi ha ka por ba biang sha ki dkhot bad kular ba ka Executive Committee kan pyrshang ban pynkloi katba lah.
