Shillong, Nailur 26: Ka jingpyninam ia ki kot kaba shitaiew lynter na kylleng ka Ri India kan sdang la shai ka sngi ha State Central Library Shillong ha kaba yn plied a u myntri ka tnad pule puthi ka sorkar jylla u Rakkam Sangma, ha ka jingiadon lang u myntri ba dei peit ia ka riti dustur bah Paul Lyngdoh.
Haba kren ha ki lat pathai khubor mynta ka sngi ha Shillong Press Club u Yuvraj Malik ba dei u Director ka National Book Fair, la ong ba ha kane ka jingpyninam ia ki kot kan dei na ki nongpynmih kot na kylleng ka Ri India bad kiba na kane ka jylla.
La ong ba kane ka jingpyninam ia ki kot kan plie lat ruh kumno ban tip ia ki riti dustur jong kiwei namar ki kot ka dei kum iiet khmih ban peit ia ki rukom im ki riti dustur jong kiwei haka ri bad ia kane ka thain shatei lam mih ngi ka Ri India. Ki don haduh 50 tylli ki dukan die kot.
U Commissioner bad Secretary ka tnad pule jong ka sorkar jylla u Pravin Bakshi la ong ba kane ka jingpyninam ia ki kot bad kan plie lat ruh ia ki briew ba ieit kot ba kin ioh ban thied lada ki dei ki kot ki bym don ha Shillong, kane ka jingpyninam kan sdang la shai k sngi bad kankut haka 3rd Risaw 2023.
