Shillong, Nailur 28: Ka shnong Rapleng kaba hap hapoh Mawkynrew Constituency kadei ka shnong kaba la sdang bha ban khring ia kiba bun ki nongwan jngoh kai pyrthei na ka jingitynnad jong ka jaka, hynrei ki don pat ki briew kiba wan kai sha katei ka jaka da kaba bret klumar ia ki tiar ba ki wanrah ka long pat ka jing i sait met ban iohi namar ka jingkhlem akor.
Halor kane ka bynta na ka liang jong ka Executive Dorbar jong ka shnong Rapleng mynta kila maham ia ki nongwan jngoh kai pyrthei ba kidei ban bud ryntih ia ki adong shnong na ka bynta ban wahrah ia ka jingkhuid jingsuba ha ki jaka jngoh kai jong ka shnong.
Haba ia kren bad ki lad pathai khubor na ka liang u Bah Seibor Warbah uba dei u dkhot ka Executive Committee jong ka dorbar shnong u la kyntu ia baroh ki nongwan jngoh kai pyrthei ba kim dei ban bret pathar ia ki tiar ba ki wanrah sha katei ka jaka jngoh kai.
“La ka dei ha Madan Rapleng ne sha Lum Rapleng ki paidbah kiba wan jngoh kai pyrthei kidei ban burom lang da kaba kim dei shu ia bret pathar ia ki bilor, ki plastic nalor kiwei pat bad kham tam eh ba kim dei ban pynbait bilor namar ka buh jingma ia kiwei pat kiba wan sha katei ka jaka” ong u Bah Warbah.
Shuh shuh u Bah Warbah u la iathuh ba ha kitei ki jaka ki don ruh ki khynnah rit kiba ap sharai masi bad lada ki ioh ban iuh ia ki bilor paid kan buh jingma ia ki, kumta u la ban jur ba haba ki wan rah ia kiei kiei ym dei ban bret pathar.
Na ka liang u Bah Fullbackstar Pyngrope uba dei u Secretary shnong barim u la iathuh ba kitei ki jaka jngoh kai pyrthei ki don kham pajih na shnong ba shong basah ki briew, hynrei naka liang jong ka shnong ka peit pyrman bha ioh mih kano kano ka jingklumar hapoh ka shnong ka thaw ioh mih ka jingklumar.
