Shillong, Risaw 05: Ïa ka Dur-im phlim Wad Ïa ka Malade ba la pynmih da ka Na-Me Productions la pyllait paitbah hynnin ka sngi 4tarik u Risaw ha Mission Compound Durbar Hall da u Rangbah Shnong ka Mission Durbar, u Bah Jeffrey Basan ha ryngkat ka jingdon lang jong u Prasanjit Mishra, u Producer & Director BLACK SCREEN STUDIO.INC u nongpynmih Film Hindi na Mumbai.
La sdang ïa ka jingïalang da ka jingduwai da u Secretary Shnong i Bah Don Kupar War, la don ryngkat ruh u rangbah shnong ka Mawbah, u bah Arestone Thabah, ki tyngshop ki puron bad kiwei de kiba la shah khot sngewbha.
Ka Wad Ïa ka Malade ka dei shaphang ka jingïaid lynti jong man la u/ka briew ha ka jingim ba shimet jong ki bad ka ai mynsiem ba ha kano kano ka khyllipmat ngim dei ban duh jingkyrmen namar u Blei u don la ka plan na ka bynta iwei pa iwei. Kane ka Dur-im ka don ïa ka story-line kaba sngewtynnat ha ryngkat ki tyngshop ki puron kiba tbit.
La ïaroh lut da baroh kiba la wan peit ïa ka sap ba ki tyngshop ki puron ki la pynpaw. La direct bad ak da i Alfidarie Kharsyntiew kum ka Puron Pdeng, ka puron jong ka “Ngan Wad Ha Ban Da Shem”, “Ka Snam Ka Ud”, “Wad Shyieng Krung” bad kiwei kiwei.
Ka long ka dur-im kaba itynnat bad ai mynsiem ïa kiwei ki para samla ba kin ïaid bad poi sha ka thong ban ïoh ïa ka jingangnud ba bha ha ka jingim. La ot ruh ïa u Cake kum ka jingplie artad ïa ka Na-Me Productions bad ka jingbam jamiet ynda la wai.
Yn pyni Paitbah naduh ka 9 tarik u Risaw 2023 shaneng ha ka Hall Dorbar Shnong Mission. ka por ban pyni ka long 12 baje, 2 baje, 5 baje bad 8 baje. Ka dor jong ka Tiket ka long 200 tyngka Marwei. Sngewbha para ri ban kyrshan lem ïa kane ka Dur-im da kaba phi ïawer lem ïa ki bahaïing bad ki paralok ban sakhi ïa ka sap ak jong ki tyngshop ki puron jong kane ka Dur-im Wad Ïa Ka Malade.
