Shillong, Risaw 06: Ka Mawhati Constituency kadei ka constituency kaba la bna nam bha halor ka jingsniew jong ka surok bad kane ka jingsniew lah ban ong ba kadei namar ka jingbym shim khia jong ki nongmih khmat kiba la leit noh bad kane ka jingeh ki paidbah kane ka Constituency ki dang hap ban mad ia kajuh ka jingeh haduh kine ki sngi.
Halor kane ka jingsniew palat jong ki surok, da ka jingsngewkhia ka mynsiem u MLA uba dei ruh u MDC u Bah Charles Charles Marngar mynta ka sngi ka 6 tarik u bnai Risaw ha ryngkat bad ki rangbah nongkyrshan jong u kila leit ban ia kynduh ia u Bah Prestone Tynsong uba dei u symbud myntri rangbah ba peit ia ka tnad Public Work Department ban pynsngew ha u halor ka jingeh ba ki paidbah ki ia kynduh.
Ha kane ka jingia kynduh na ka liang u Bah Charles Marngar u la aiti da ka dorkhas kaba la kdew ba la donkam ban shna noh da ka surok intermediate lane na ka shong Sonidan shaduh sha Umsiang, ka surok na shnong Umkra shaduh ka shnong Syntumaw bad ka surok shnong ha ka shnong Sonidan.
Haba ia kren bad ki lad pathai khubor u Bah Charles Marngar u la iathuh ba n aka liang jong u symbud myntri rangbah u Bah Prestone Tynsong u la ai ka jingkular ba mardor yn btah ia ki ophisar ban pynkhreh ia jingmang pisa na ka bynta ban shna noh ia kitei ki surok.
U Bah Charles u la iathuh ba kiba bun ki surok ha ka thain Mawhati jan baroh kila sniew bha bad kiba la kylla long kum ki pung dohkha bad kane kala ktah bha ym tang ia ki paidbah nongleit nongwan hynrei wat ia ki trai kali ruh kumjuh.
U Bah Charles u la iathuh ba ka surom Umsning Jaki road ka don kumba 80 km bad kaba sah 40 km ki paidbah ka constituency ki dang mad i aka jingeh namar ba ka surok ka sah beit kumjuh haduh mynta kaba la buh jingeh n aka bynta ki paidbah ha ka leit ka wan.
Kum shi bynta ban weng shipor ia ka jingeh ki paidbah bad katba ka jingmang pisa na ka tnad PWD kan dang iaid, kane ka kynhun kala buh ruh ka jingkyrpad ia u symbud myntri rangbah ba kin maramot noh shwa ia kane ka 40km khnang ban suk ka leit ka wan.
U Bah Charles u la ong ruh ha kaba iadei bad ka surok Mawrong road u la iathuh ba ia kane ka surok ka la long kaba sniew bha bad ka buh jingeh ha ka leit ka wan ia ki paidbah, bad u la pyntip ruh ha men ha kane ki la ioh ia ka PMGSY 5 km bad kaba sah mynta ka long sa 17 km ba shen un sa khot tender noh u la ong.
