New Delhi, Risaw 20: Ka Ayushman Bharat PradhanMantri – Jan Arogya Yojana (AB PM-JAY) ka la tam ia u mawmer ha ka jingdon mynta 26 klur tylli ki Ayushman card ha baroh kawei ka ri ha ka 19 tarik u Nailur 2023. Kane ka skhim kaba pyntreikam da ka National Health Authority (NHA) ka pynbiang pisa haduh T. 5lak ia 12 klur tylli ki longiing na ka bynta ki jingsumar.
Ka jingshna ia ka Ayushman card ka dei kawei na ki kam kiba nyngkong hapoh ka Ayushman Bharat PM-JAY bad la shim ia ki sienjam ban pynthikna ba baroh kiba ioh jingmyntoi na kane ka skhim ki don ia ka Ayushman card.
Ka dei kawei na ki kam kiba kongsan hapoh ka AyushmanBhavah campaign kaba la sdang da ka jingthmu ban pynthikna ba baroh ki ioh jingmyntoi na ki skhim jong ka Sorkar India kiba iadei bad ka koit ka khiah.
Naduh ba la sdang ia kane ka campaign ha ka 13 tarik u Nailur 2023, la ioh 1.5 klur tylli ki jingkyrpad ban ai Ayushman card ha ka rynsan IT jong ka NHA. Ha u Nailur 2023, la shna 86 lak tylli ki Ayushman Card haduh ka 19 tarik jong une u bnai.
Khnang ban poi sha baroh ki jaka, ka NHA ka la pyllait paidbahia ka ‘Ayushman App’ na ka bynta ka jingshna ia ki Ayushman Card. Kane ka app ka ai lad ban ai jingpynshisha da lade.
Lyngba ki saw tylli ki sienjam ba suk, kane ka plié lad ia ki briew ba kin shna ia ki Ayushman card khlem da hap leit sha ka jaka shna ia kine ki card. Shuh shuh, baroh ki briew ki lah ban iarap ia kiwei ba kin shna ia ki Ayushman card.
Kumta, ka Ayushman App ka plié lad ia ka Jan Bhagidari. Ia ka jingseisoh jong kane ka app lah ban iohi lyngba ka jing download haduh 26 laksien ia kane ka app naduh ba la sdang ia ka ha ka 13 tarik u Nailur, 2023.
Mynta ka Ayushman Card ka la dei ka dak jong ka jingryntih, ka jingioh bynta bad ka jingpynkupbor. Ka ai jingshngainia kiba duk ba suk bad ki longiing kiba shem jingeh ba ki don jingiada na ka jingpang bad ka jinglut jingsep kaba ki hap mad haba ki ioh pang. Namar kane, ka Sorkar ka la leh ia kaba donkam ban pynthikna ba baroh kiba dei ban ioh bynta ki don ia ka Ayushman Card.
Lyngba ka jingdon 4 klur tylli ki Ayushman Card, ka Uttar Pradesh ka ialam lynti ia kiwei kiwei ki ri ha ka jingdon ki Ayushman card. Ka Madhya Pradesh ka wan ha ka kyrdan kaba ar ha ka jingdon 3.69 klur tylli kine ki card bad ka Chhattisgarh ka wan ha ka kyrdan kaba lai da kaba don 2.04 klur tylli kine ki card. Shuh shuh, ka long kaba sngewhunbha ba 49% ki Ayurshman card ki dei kiba bat da ki longkmie.
Ka Ayushman Bharat PM-JAY ka la ai jingiarap ia 5.7 klur tylli ki jingsah hospital kaba kot sha palat T. 70,000 klur. Kumta, ka la tyngkai palat 1 lak klur na ka pla jong ki ba duk ba suk bad ki longiing kiba shem jingeh.
