Shillong, Naiwieng 03: Mynta ka sngi ka seng HANM kala pylong ia ka jingiakhih ha Jantar Mantar ha nongbah Delhi ban dawa na ka sorkar pdeng ban pynrung ia ka ktien khasi ha ka khyrngit kaba phra jong ka Riti Synshar ka Ri India bad ban pyntrei kam ia ka Inner Line Permit bad ban pynbeit noh ia u pud u sam.
Ha ka jingkren jong u president ka seng u bah Lamphrangsngi Kharbani la ong ba ban pyngrung ia kano kano ka ktien ha ka khyrngit kaba phra dei ha ka jingmynjur jong ka sorkar pdeng ban thung ia ka kommittee ka dei tang ban pyndep rukom ka shong ha ki briew kiba don ha ka por, kane ka jingdawa kala kot sha ka 40 snem ei ei.
U bah Lamphrang la ong ban pynrung ia ka ktien khasi ha ka khyrngit kaba phra don kam ia ka jingiatreilang da baroh ki 60 ngut ki MLA ka jylla, ban pynrung ia kano kano ka ktien ka shong ha ka rai jong ka sorkar pdeng.
Haba ia dei bad ka jingdawa ia ka ILP ka seng ka dawa ba ka sorkar pdeng ka dei ban pdiang ia ka rai jong ka sorkar jylla na ka bynta ban ia da na ka jingwan tuid kyrthep ki briew sha kane ka jylla, kumta ka seng ka dawa ba ka sorkar pdeng ka dei ban pyntrei kam noh ia ka Bengal Eastern Frontier Regulation Act 1873.
Ha kane ka jingialang la dawa ruh na ka sorkar pdeng ban kyrshan ia ka sorkar Meghalaya bad Assam ba kin dup lah ban ia pynbeit hapdeng kine ki ar tylli ki jylla kaba la sahteng mynta la san phew snem, ban ioh ia ka shongsuk ha khappud don kam ban pynbeit noh ia u pud u sam.
Ha kane ka sngi palat spah ngut ki dkhot ka seng HANM kila pynlong ia ka jingiapyrta ban pynpaw sha ka sorkar pdeng ba ka jylla Meghalaya ka don kam ia ka ILP bad ban pynrung ia ka ktien khasi ha ka khyrngit kaba phrang jong ka riti synshar ka Ri India bad kane ka long ka sien kaba nyngkong ba kum ka seng kan pynlng ia ka jingiakhih ha Delhi.
