Shillong, Naiwieng 18: Klumar jingmut kiba dang pynkhreh ban ia khun ia ka MDC sha ka iing dorbar thawain jong ka Khasi Hills Autonomous District Council (KHADC) kane ka jingklumar jingmut kiba dang thmu ban ialeh ia ka elekshon ka dei na ka jingthaw ia ka “Delimitation Committee”.
Ka jingkylli kaba kiba bun ki la pynkhreh ia ka elekshon MDC kaba dei ban long ha u bnai Rymphang 2024, ka long hato kane ka Delimitation Committee ka lah ne em ban pyndep ia ka jingpynwandur ia ki 29 tylli ki konstitwensi hapoh jong ka KHADC ha kine ki ar bnai khlem da khein ia u bnai ban long elekshon.
Ka mih ruh ka jingkylli na kiba peit pyrman ba kane ka jingthaw ia ka Delimitation Committee hapoh ka jong ka KHADC ka lah ban long kawei na ki daw leh se ban pynjlan ia ka elelshon sa hynriew bnai, ban pynbiang ia ki konstitwensi ki ban pynwan dur thymmai.
Ynda ka KHADC kala pdiang hapoh ka iing dorbar ia ka jngpynthymmai ia ki konstitwens kin hap ban phah sha u lat ka jylla ban ioh ia ka jingmynjur bad haba la ioh ia ka jingmynjur kin sa pynkhreh ia ka electoral roll, ia kaba la thikna ba yn nym lah ban pyndep hapoh ka ar bnai.
Lada ym pynjlan ia ka elekshon hapoh KHADC ka delimitation committee kan nym lah ban pyndep ia ka jingpynwan dur thymmai ia ki 29 tylli ki konstitwensi kan nym lah, nalor kata ban pynthymmai ki konstitwensi hap ban pdiang da ka iing dorbar ban phah sha u Lat ka jylla ban ioh ia ka jingmynjur.
