Shillong, Naiwieng 22: Ka sorkar jylla kam dei shuh ban pynslem , dei ban aiti noh mardor sha ka CBI ban ioh ka jingbishar kaba khuid ia kaei ba lah dep jia ha Mukroh.
Ka seng JSU ka pynkynmaw sha baroh ka jaitbynriew Hynñiewtrep ba ngim dei ban klet ia kaei ba lah dep jia ha ka shnong Mukroh ha u snem ba lah dep ba haduh 5 ngut ki mynsiem ba lui lui ki lah kyllon iap u ktang suloi ki pulit Assam .
Ka seng ka pynpaw ruh ia ka jingsngewlem sha ki bahaing bahasem jong kito kiba lah khlad noh ha u kuli ki pulit Assam, ka seng ka pynkynmaw ba dei hadien ka jingdawa ka seng na u Myntri Rangbah ka jylla u Conrad K Sangma u ba lah wan iuh kjat ha Mukroh ha u snem ba lah dep.
Ka JSU ka dawa na u ban buh mardor ia ka ktem pulit (Border Police Out Post) ha Mukroh ban ai jingiada iaki paradoh parasnam kiba shong sha khap pud ka jylla hynrei kane ka Oupost ruh kam pat biang than namar kadei ba dang shu sop daki tin.
Na liang ka seng JSU ka dawa na u Myntri Rangbah ka jylla ba dei ban pynkloi noh ban ai kti ia kane ka jing jia ba lah dep ha Mukroh sha ka CBI ban ioh ka jingbishar kaba khuid bad ym dei shu ban pynslem namar lah jan don ar bnai myntam lah shu kut tang haka jingkular ban aiti shaka CBI hynrei ka sorkar ka dang pynsah teng haduh mynta.