Shillong, Nohprah 04: U Myntri Rangbah ka jylla u Conrad K Sangma u la ong ba nalor ki iew sorkar kiba don, ka sorkar kala shna ruh shibun ki iew jong ki nongrep ha jylla bad la shah ia ki nongrep ba ki buh ia la ki jong ki kyndon ban pyniaid ia ka iew ka hat.
Ka sorkar kala shah ba kin seng ia ka kynhun ba kin pyniaid iakine ki iew katkum ka jingstad ka jong ki da kaba don ia ki kyndon khnang ban nym don mano mano ruh balah ban shim kabu ha kum kine ki iew da kune ne da kumtai bad la ai bor pura ha ki nongrep ba kin pyniaid.
Ka sorkar kala shim ia kane ka sien jam ban kyntew ia ki nongrep ha ka jylla bad ka sorkar kan dang iaid bteng ban dang pyniar shuh shuh ia kum kine ki iew, bun na kine ki iew kila trei kam bad ki dang don kiba yn sa pyntrei kam noh shen. Ka sorkar kala shim ia kine ki lat ki lynti bad ban pynthikna ba kum kine ki jingiarap ia ki nongrep yn dang iaid bteng.
Ban bteng ia ka jingkren u myntri rangbah ka jylla ka myntri ka tnad rep ka Dr. Ampareen Lyngdoh kala ong ba ka rukom pyrkhat ia ka jingpynaid iew ia ki marrep mynta kam dei shuh kum kata ka rukom pyniaid ia ki marrep la, dei shuh kito ki rukom kiba rim, mynta kala kylla.
Ka sorkar jylla kan iarap ia ki nongrep ban die ia ki marrep online bad kane ka ei ka rukom pyrkhat bad ka sorkar kan pynthikna ba ki nongrep kin ioh ia ka iew ban die kylleng ka pyrthei bad kaei kaba ka sorkar ka leh mynta ka long ban ioh ia ka Syrnot GI ban die ia ki marrep jong ki nongrep, kumba laong mynta u shynrai Lakadong u la ioh bad mynta dang pyrshah ia u Sohniamtra.
Kane ka dorbar bah kaba lai jong ki nongrep la pynlong mynta ka sngi bad ban pynkut la shai ka sngi kin ia kren ia ki jingeh jong ki nongrep bad kaei kaba yn leh ban weng ia kito ki jingeh kaba ki nongrep ki ia kynduh ia kane kin iatai ha kine ki ar sngi ia kaba la plied a u myntri rangbah ka jylla Meghalaya ka sngi ha ka jingdon lang u bah A L Hek myntai ba dei peit ia tnad kam ri jingri.
Ha kane ka dorbar bah kaba lai jong ki nongrep kiba la ia poi ki long na kylleng ka jylla Meghalaya, katkum ka jingtip kaba la ioh na kiba la register ia lade ki don palat ia ka 500 ngut nongrep kiba la wan ban ia shim bynta.
