Shillong, Nohprah 11: Mynta ka sngi ka North East Students Organisation (NESO) kala pynlong ia ka jingiakhih ha kylleng ki jylla kane ka thain namar ba ka niew ba ia kane ka sngi ka 11 Nohprah kum ka sngi ba dum namar dei ha kum kane ka sngi ka Parliament kala pdiang ia ka ain Citizenship Amendment Act (CAA).
Na ka liang jong ka NESO kala pyrshah jur bha ia kane ka jingthmu jong ka sorka pdeng ban nym pdiang ia kane ka ain hapoh parliament, ne da kaba pynlait noh ia ka North East ia katei ka ain, hynrei la pdiang ia kane ka ain wat hapdeng ka jingpyrshah da ki paidbah kane ka thain.
Ka seng samla pule kane ka thain ha ka lam jong ka NESO kala pynbna ba la niew ia kane ka sngi 11 tarik u bnai Nohprah la niew kum ka sngi kaba dum na ka bynta ki paidbah kane ka thain shatei lam mihngi baroh kawei.
Ki seng samla pule bapher bapher ha ki jylla la ki jong ki jong mynta ka sngi kila pynlong ia ka jingiakhih da kaba jar jar don kiba iaid paidbah don kiba shong kyllain mungor, ha Meghalaya ka KSU kaba dei kwei na ki dkhot ka NESO kala pynlong ia ka jingwah lama iong ha ryngkat ki jingthoh.
