Shillong, Nohprah 17: Ka Khasi Students Union North Khasi Hills District Unit mynta ka sngi ka 16 Nohprah 2023 ka la nang ioh bor shuh shuh da ka jingpynkha sa ia kawei pat ka Circle hapoh jong ka District ha kaba la tip kum ka Khasi Students Union Umden Circle, ha kaba kane ka Circle kaba Thymmai kan kynthup ia ki 12 tylli ki shnat treikam jong ka Seng ha ki thaiñ Umden.
La wan ban pyntian Smai ia ki Nongialam ba Nyngkong jong kane ka Circle da u Samla Rangbah Raymond Kharjana Organising Secretary ka KSU Seng Kmie, ha ryngkat u Samla Rangbah Ferdinald Kharkamni President KSU NKHD Unit, U Samla Rangbah James Hitler Mawphniang u ba dei u Legal Affair Secretary ka KSU Sengkmie ha kajuh ka por u ba bat ruh kum u General Secretary ka KSU NKHD Unit, ki Nongialam ka KSU NKHD Unit bad KSU Nongpoh Circle nalor kiwei pat.
La pynlong ia kane ka Lympung Pynskhem ia ki Nongkitkam ba Nyngkong jong ka Seng ha St Joseph Higher Secondary School Umden .Haba ai jingkren ha kane ka lympung u Samla Rangbah Raymond Kharjana uba la shim ruh ia ka bynta ban pyntian Smai ia ki Nongialam ba Nyngkong jong kane ka Circle kaba Thymmai .
Ha katei ka sngi u la kren da kaba u la kyrtiang dien khyndiat halor ka Jingiaid lynti jong ka Seng naduh ba Seng ia ka haduh mynta mynne da kaba ong ruh ba ka jinglah jong ka Seng KSU ban ai ka jingshakri sha ki paid ka bri u Hynniewtrep dei namar ka jingskhem jingmut bad ka Nongrim ba skhem bad ba Rangbah jong ki Nongialam kiba dang don bad kiba la leit noh.
“Dei ma ki, kiba la saindur bad la pynlong ia ka Seng ba Kan ieng rasong kumne kumba long mynta bad dei lyngba ka KSU la mih Shibun ki Nongialam ba stad bad ki riew shemphang hapoh ka Ri Khasi bad Jaintia.” ong u Samla Rangbah Raymond Kharjana.
“Ha ki snem kiba kham mynshwa kum ka Jaitbynriew ngi la mad ka jingshah ibein ha ki briew kiba wan wir wan hap na kiwei ki Jylla la ka long ha ki kam ki jam ne ha ka pule ka dangle, hynrei ka KSU ka la mih sha Khmat ban iada ia ka jong ka Jaitbynriew lyngba ka Jingialam jong ka Seng bad u wei na kita u dei u Bah Bull Nongjop Lyngdoh ban kwai ha dwar U Blei.
U tei u riew rangbah u ba ialam ia ka Kynhun ban rat naphang lut ia ki Mynder ha kato ka por la ka long ha sor ne ha khap sor, bad kane ka jingshlur jong u Bah Bull Nongjop Lyngdoh ka la wanrah ka jinglong shngaiñ ha ka mynta ka jong ngi.” bynrap u Samla Rangbah Raymond Kharjana.
U Samla Rangbah Raymond u la kyntu ruh ia ki Nongialam ba Nyngkong jong kane ka Circle kaba Thymmai ban don ka Mynsiem ban aiti lut na ka bynta ka Jaitbynriew bad ban don ruh ka Mynsiem sngewrit.
“Wat ai ba ka jingdon jong phi hapoh ka KSU Kan pynlong ia phi ban leh ba heh ne sarong, hynrei iaid da ka jingsngewrit, long ruh kiba lah kloi ban ia treilang bad ki Nongialam Shnong ne ki Seng Longkmie ne Seng Samla hapoh ka Imlang ka sahlang ban wanrah ia ka roi ka par bad ka bha ka miat.
