New Delhi, Nohprah 19: Ka International Monetary Fund, IMF ka la iaroh ia ka jingskhem ki kam ka ioh ka kot ha India wat hapdeng ki jingeh ha kylleng ka pyrthei.
Ka Fund, ha ka kaiphod Article IV consultation kaba ju pynmih man u snem ka la ong ba ka India ka la mih kum u khlur bad la antad ba kan don ka bynta kaba palat 16% ha ka jingkiew shaphrang jong ka pyrthei.
Ka la ong ba lyngba ki jingkyrshan jong ki polisi macroeconomic, ka India ka la khreh ban long kawei na ki ri kiba don ka ioh ka kot kaba kiew stet tam ha ka pyrthei mynta u snem.
Ka kaiphod ka la ong ba ka don ka jingtrei kaba khlain na ka liang jong ka Sorkar ban bei tyngka ha ki jingdon jingem bad ban pynbiang ia ki kam logistic kiba donkam na ka bynta ka nongim jong ka jingkiew shaphrang.
“Ka Sorkar ka la pyntreikam ia katto katne ki jingpynkylla, bad kawei na kiba kongsan tam ka dei jingpynkylla digital kaba la kiew shaphrang katba dang iaid ki snem bad kaba la buh ia ka India ha ka ryngsan kaba khlain na ka bynta ka jingkyntiew ia ki bor pynmih mar bad ka roi ka par ha ki por ban wan,” ka la bynrap.Ka la antad ba ka ioh ka kot jong ka India kan kiew da 6.3% ha une u snem.
“Ka India ka don lad ban kiew shuh shuh, lyngba ka jingnoh synniang na ki nongbylla bad ki briew, lada pyntreikam ia ki jingpynkylla,” la ong ka IMF.Ka la ai jingmut ba ki polisi ki dei ban peit bniah ia ka jingpyndap biang ia ki fiscal buffer, ka jingpynthikna ia ka jingryntih ki dor, ka jingpynthikna ia ka jingiaid beit iaid ryntih ki kam pisa, bad ka jingpynstet ia ka jingkiew shaphrang lyngba ki jingpynkylla.
Ka IMF ka la iaroh ruh ia ki sienjam jong ka RBI bad ka jingieng skhem jong ka ban wanrah ia ka jingryntih ki dor. Ka la kubur ba ka neutral monetary policy kaba mynta, kaba ieng halor ka rukom treikam kaba don nongrim ha ka data.
Ka long kaba iahap bha bad ba kane ka la wanrah biang ia ka jingkiew dor sha ki thong. Ka Monetary Policy Committee jong ka RBI ka la kyntiew ia ka bai repo da 250 basic point ha u 2022-23 sha ka 6.5% ban pynhiar ia ka jingkiew dor hadien ka jingkiew kynsan ki dor ha kylleng ka pyrthei.
