Shillong, Nohprah 20: Ka KSU Wapung bad Ladrymbai Unit mynta ka 20 tarik Nohprah ka la buddien bad iai ban ban dawa bam maramot noh kloi ia u surok Lad Rymbai Bypass u ba la jot rathai ha kine ki snem ba la dep bad haduh mynta.
Ka seng ka la ioh ban iakynduh ia ka Additional Deputy Commissioner ka district ha kaba na ka liang ka seng ka la ban bad buddien ban maramot noh ia une u surok.
Ka daw bah kaba pynlong iaka seng ban dawa ban maramot kloi ka long halor ka nongrim ba ki kali heh ki lah iaid na katei ka surok mynta la shitaiew kaba la pynsuk iaka leit ka wan ha ka thain Ladrymbai bad la duna ka dheng kali kumba long mynshwa.
Kumban shu pynkynmaw ka seng halor kane lyngba ka Wapung unit ka la leit ban buh jingthoh nyngkong sha u EE PWD roads Khliehriat Division ha ka 22 tarik u Nailur (September ) 2022 bad kane ka kynti kaba mynta ka seng ka ngeit skhem ba ka tnat ba dei peit kan maramot noh ia une u surok u ban pynsuk iaka leit ka wan ki paidbah.
Ka seng ka iohi ba ka jingiaid ki kali heh na une u surok ka lah iarap shibun ha ka ban pynduna iaka jingdheng kali ha shi lynter ka shnong bad iew Ladrymbai bad ia u surok dei ban maramot noh bad pynjanai khnang ba ki kali heh kiba iaid ruh kin nym jynjar bad ba kin suk.
Ka seng ka pynpaw ruh iaka jingsngew nguh iaka tnat pulit ba la shim khia ban pynduna ka dheng kali ban ka seng kan dang iai bteng ban ia treilang ha kino kino ki mat kiba ktah bad kiban rah jingmyntoi ia u paidbah. Ka seng kan sa ai ruh iaka copy jong ka dorkhas sha u EE PWD roads Khliehriat Division halor kane ka mat.
