Shillong, Nohprah 20: Mynta ka sngi mar ia sdang ka iing dorbar tlang u nongialam ka liang pyrshah u bah Titosstarwell Chyne nongialam ka liang pyrshah u la wanrah ia ka, jingpynbeit , ba la da 21 ngut ki MDC ki ia soi lang lah lah ban khot ia ka dorbar ba kyrpang.
U Nongialam ka liang pyrshah u la kwah ban tip hato ia kane ka jingshong dorbar kaba mynta kaba lai sngi lynter kin khien na ka dorbar ba kyrpang ne ha kano ka rukom namar ha ka dorbar kyrpang ym don jingkylli ha kaba ki dkhot ka liang pyrshah kin ioh lat ban buh jingkylli.
U bah Chyne u la pynkynmaw ba ha u snem 2018 por ba lang CEM u bah H.S Shylla bam kwai ha dwar u blei la khot ia ka dorbar ba kyrpang tang ba khlem khein ha District Council katba ha Assembly ki khein, la ong ba la dei ban pynkylla noh ia ka AD Rule ban iaid beit ka jingpyniaid ia ka dorbar.
Halor kane ka jingkylli jong u nongialam ka liang pyrshah u Symbut Chief Executive Member jong ka KHADC u bah Pynshngian N Syiem la ong ba ka rule ong ba ia ka iing dorbar la lah ban khot ha kano kano ka por tang kam dei ban palat ia ka saw bnai, haba bud ia ka jingpynlong dor kumba long ha Assembly la khienlang ia ka dorbar kyrpang ruh.
U bah Pynshngian u la kubur ia kaei kaba la kren da u nongialam ka liang pyrshah ba la don kam ban pynkylla ia ka AD Rule ban lait kine ki jingbym ia shai, kumba ka long mynta ka don ha pdeng ka jingeh namar byn shai ka Rule namar ki hap ban bud katkum ka rule.
U bah Jambor War ruh u la wan rah ia ka jingpynbeit, ha kaba u la ong ba katkum ka rule ia ki Bills dei ban ioh 30 sngi shuwa ban long ka jingiashong dorbar hynrei kaei kaba jia ka long ba dang shuioh mynta ka sngi kaba kin lah ban pdiang.
Haba kyrshan ia katei ka jingkren u bah Jambor War, u nongialam ka liang pyrshah u bah Titosstarwell Chyne u la ong ba kane ka jingleh ka long ba khlem burom shuh iaki para dkhot ka iing dorbar, dei ban kynmaw ba la jied da ki paidbah.
Halor kane ka jingkynnoh bah P N Syiem u la pynshai ba lada don kam kyrieh na ka liang jong u Shnongknor ka iing dorbar u la ban weng ia kitei ki kyndon hapoh ka rule 73(2) , bad u Symbut CEM u la ong ba don kam ban pynkylla ia ka AD Rule ban ia shai
