Shillong, Jylliew 22: Ka Sein Jaintia Shillong ha ka jingia trei lang bad ka Sein Jaintia Women’s wing mynta ka sngi ka 22 tarik u Jylliew 2024 ka la ioh ban pynkup burom ia ka Kong Silbi Passah ka ba dang shu ioh shen ia ka Padma Shri Award bad kum juhruh ia ka heprit Mansan Najiar ka ba dei ka nongthohkot ka ba dangkhynnah.
Ia kane ka jingpynkup burom la ioh ban pynlong ha Sein Jaintia Hall, Qualapatty Shillong ha ka ba u bah Paul Lyngdoh myntri ba dei khmieh ia ka tnad Arts and Culture u la long kum u kongsan ha ka jingiadon ryngkat lang ki nonghikai jong ka Sein Jaintia Secondary School, ki dkhot jong ka Sein Jaintia Women Wing bad kiwei kiwei pat ki nongshah khot sngew bha.
Ha kane ka program pynkupburom la ioh ia ka jingkren pdiang na ka kong Maya Kyndiah Vice President jong ka Sein Jaintia Women Wing, la ioh ia ka jingrwai pdiang na ki dkhot ka Sein Jaintia Women’s Wing, la ioh ruh ia ka jingshad tynrai na ki nonghikai jong ka Sein Jaintia School bad la ioh ruh ia ki kyntien ai khublei na u bah Armanki Pariat Secretary Sein Jaintia.
Ha ba ai jingkren ha kane ka jingpynkup na ka liang u bah Paul Lyngdoh u la ong ba kane ka jingioh jong I kong Silbi ka la long ka jingkmen ia ka Jylla ha ka ba I la ioh ia ka jingi thuh na ka Sorkar India ha lor ki kam ba I trei.
U la ongruh ha kyrtiangdien ia ka jingwanpoi jong u Thomas June ha Sohra ha ka ba ha kane ka sngi ka la poi sha ka 183 snem mynshwa bad ha ba ngi phai sha kine ki snem ka jingithuh ia ka jaidbynriew jong ngi ka dang long ka ba dang kham khynnah bad ha ba ngi phai sha ka jingkiew jong ka jaidbynriew ha ka liang ka rwai ka siaw, ka Culture jongngi bad ha baroh ki liang.
U la ong ruh ki la don bun ki briew jongngi ki ba la kiew sha ki kyrdan bapher bapher ki la don ki ba la ioh ban bat ia ki kam kum ki chairman jong ka UPSC, Chief Election Commission jong ka India bad kiwei kiwei. U la ongruh da ka ba pynkut ba lada ngi don kamon ka don ka Lynti.
Ha ba ai jingkren na ka liang ka heprit ka Mansan Najiar ka la ongba ka kam thoh kat kam long ka ba suk ha ka ba shibun ki nongthoh ki ba la paw hynrei kane kam dei ban pynlong ia ba kan kynrandien na ka kam thoh kot hynrei kan ialeh ialde ba kan ioh ban kiew sha jrong bad kham shajrong.
