Shillong, Nailar 29: Ka seng JSU seng kmie ha ryngkat ki nongialam ka JSU Elaka Labang Nongphyllut bad ki dkhot ka seng ki lah ioh ban ialynduh bad u heh ophisar ka jylla u Secretary ka sorkar jylla i Bah Cyril V Diengdoh IAS bad ka seng ka lah phah lang iaka dorkhas sha u Myntri Rangbah ka jylla bad sha u Chairman ka Regional Committee u Ma Snaiawbhalang Dhar.
Ha ka jingkynduh ka seng bad u Secretary mynta ka sngi na liang ki nongialam ka seng ki lah ai bad ka dorkhas ryngkat bad ki kot ki sla ban pynshisha bad pynskhem iaka jingdawa ki nongshong shnong ka jaitbynriew Khasi Jaintia ban pynphai noh iaka Block 1 sha Meghalaya.
Na ka liang u Secretary ka sorkar jylla u lah ong ba sorkar kan shim khia iakane ka jingpynsngew bad ka jingdawa bad un sa wanrah iakane ka mat ha ka miej u Myntri Rangbah ka jylla ban leh ia kaba donkam.
Ki nongialam ka seng JSU na Labang Nangphyllut Circle u President ka seng u samla Salbius Myrten bad u Vice Presiedent la seng u samla Elias Lamare ki lah ong ba ki kyrmen skhem ba kane ka jingpynbeit jaka hapdeng ka sorkar Assam bad Meghalaya ki dei ban lah ban pynphai iaki jaka na Block 1 kaba lah shah pynhap ne kynthup jubor da ki 70 tylli ki snem sha United Mikir bad North Cachar Hills District (Karbi Anglong mynta) hapoh ka jylla Assam.
Na ka liang u General Secretary ka seng u samla nongialam u samla Treibor R Suchen u lah ong ba kum ka seng naka por shaka por ki don lang bad la ki paradoh parasnam kiba shong ba sah sha Block 1 khamtam bad ka Elaka ka ba lah rim lah jah noh na ka hima Jaintia ka Labang Nangphyllut kaba shah pynhap jubor sha Mikir Hills lyngba ka hukim u Governor ka Assam 1951.
U samla Treibor u lah ong ruh ba naduh ki por jong ki nongialam barim ka seng ki juh bud dien bha iakane ka mat ingdawa na ka sorkar bad ka seng JSU ryngkat bad ki nongshong shnong ka Block 1 kiba lah shah ieh khunswet lah daka phew tylii ki snem sha Assam ki angnud shisha ia mynta ba kane ka jingpynbeit pud hapdeng ki artylli ki jylla khamtam ban ioh pynphai biang iaka Block 1 bad 2 sha ka jylla Meghalaya kan sei soh noh shi siendon ha kane ka wat pynbeit jaka.
U lah ong ruh ba ka sorkar ka dei ban sngewthuh shai ba la Block 1 ba ymdon kata ka jingpynbeit pud ne pynbeit sam hynrei shisien don donkam ban pynphai biang (retransfer) iaka Block 1 bad kiwei ki jaka ka Khanduli bad Psiar sha ka jylla Meghalaya bad pynduh pyndam (repeal) iaka hukum lane Notification No.TAD/R/31/50/148 dated 13th April,1951.
