Shillong, Nailur 18: Ka Myntri Sorkar Pdeng ba dei khmih iaka tnad Kam Pla Tyngka, NirmalaSitharaman ka la pliepaidbah ia ka skhim NPS Vatsalya mynta ka sngi, kaba kyntiew ia ka jingsngewthuh ia ki kam pisa bad ka jingkynshew pisa da ki samla jong ka India.
Kum shi bynta kane ka jingpyllaitpaidbah, ka la pynbna shaphang ka rynsan online ban iasoh lang ha kane ka skhim bad ka la pyllait ruh ia ka jingthoh ai jingbatai shaphang kane ka skhim. Shuh shuh ka la sam ia ki Permanent Retirement Account Number (PRAN) card sha ki khynnah kiba rung thymmai hapoh kane ka skhim ha kane ka sngi.
La pynlong ruh ia ka prokram ai jingtip da ka State Level Bankers’ Committee (SLBC) Meghalaya bad NABARD, ia kumba 100 ngut ki khynnah pule na ar tylli ki skul ha nongbahShillong, Meghalaya.
Ka prokram ai jingtip hynnin ka sngi ha Kelian Memorial School, Shillong, ka la sakhiia ka jingiashim bynta 51 ngut ki khynnah ha ka prokram ba la saindur ban ai jingtip ia ki shaphang ka jingkongsan ban pynkhreh lypa ia ki kam pisa bad ki jingmyntoi jong ka National Pension System (NPS).
Hadien kane, la don kane ka juh ka prokram ha Grace Academy School, Upper Lachumiere, Shillong, ha kaba 60 ngut ki khynnah ki la iashim bynta.
Ka NPS Vatsalya ka plie lad ia ki kmie ki kpa ba kin kynshew pisa na ka bynta ka lawei jong ki khun jong ki da kaba bei tyngka ha ka account bai bam tymmen bad pynthikna ia ka jingriewspah lyngba ka bor jong ka sut.
Ka NPS Vatsalya ka don ki lad kynshew ba bun jait, kibaplie lad ia ki jingbei tyngka ba T. 1000 ha ka shi snem ha ka kyrteng jong ki khun bad kane ka plie lad ia baroh ki longiing ba kin rung hapoh kane ka skhim.
Ia kane ka sienjam ba thymmai la saindur ban sdang kloi ia ka jingpynthikna ia ka lawei kaba phyrnai jong ki khynnah, bad ka dei ka sienjam kaba kongsan ha ka kam bai bam tymmen jong ka India. Ia kane ka skhim yn pyniaid hapoh ka Pension Fund Regulatory and Development Authority (PFRDA).
Ka jingsdangia ka NPS Vatsalya ka pyni ia ka jingkut jingmut ka Sorkar India ban pynshlur ia ka jingpynkhreh kaba jrong samoi ha ki kam pisa bad ka jingshngain ia baroh.
