Shillong, Risaw 18: Ka All Khasi Hills Tourist Taxi Association (AKMTTA) mynta ka sngi ka 18 tarik u Risaw 2024 kala ai jingmut iaka Sorkar Jylla ban pyntreikam daka Reciprocal Transport Agreement (RTA) lane ka jingai kamai mar kylliang iaki kali kamai tourist hapdeng ka Meghalaya bad Assam.
Ia kane ka jingtyrwa la wanrah ha ka jingialang kaba la khot pynlong da ka Committee ka Sorkar bala khlieh da u Director ka Tnad Tourism Bah Cyril V Diengdoh bad ki seng ka kynhun niah kali kamai Tourist.
Kane ka jingdawa ka AMKTTA ban pyntreikam daka Reciprocal Transport Agreement (RTA) ka dei ban pynsuk ia ka leit ka wan jong ki nongjngohkai pyrthei hapdeng ka Jylla Meghalaya bad Assam.
Haba kren shaki lad pathai khubor hadien ka jingialang, u Bah Balajied Jyrwa, u Secretary ka AKMTTA, u la pynpaw ba ka seng kala wad iaki lad lynti ban pynrung ïa ka Jylla Meghalaya ha ka RTA bad ka Jylla Assam ban pynthikna ba ka leit ka wan sha shiliang pud kan long kaba suk.
U la ong ruh ba ha kane ka jingialng ngi la shim iaka rai ban pynbor iaka Sorkar Jylla ba kan pyntreikam ïa ki RTA ha ka jylla jong ngi. Kane kan ïarap ban pynsuk ïa ka leit ka wan jong ki kali Tourist hapdeng ka Assam bad Meghalaya.
U Bah Balajied u la kam ba kiwei ki Jylla kum ka Odisha, Haryana, Jharkhand bad Delhi ki pyntreikam iaka RTA ban pyniaid iaki kali kamai hapdeng ki Jylla marjan.
Ula iathuh baka haka jingialang, ka AKMTTA ka la buh jingkylli iaka tnat Tourism halor ka jingtreikam bad jinglong ain ki jingai jingbit shipor (Temporary Permit) iaki kali kamai Tourist bad kumno ki Dribar ba dei hok ban ioh kamai, ki lah ban ioh jingmyntoi naka tnat Tourism.
U la ong ruh ba mynta ka sngi ngi la buh ha khmat u Director ka tnat Tourism, ngi la dawa ban kynthup iaki kynhun niah kali kamai Tourist kiba don hapoh ka AKMTTA hapoh ka App jong ka tnat Tourism ka Sorkar Jylla khnang ba kin lah ban pyniaid bad kit ia ki nongleit, nongwan jngohkai pyrthei sha kylleng ka Jylla.
Katba na ka liang u Chairman ka Committee Bah Cyril Diengdoh ula iathuh ba ka Committee kala bthah ia baroh ki seng jong ki kali tourist ba kin aiti da ka jingthoh ia ki jingai jingmut na ka bynta ban ioh bishar bad leh ia kaba donkam.
U la ong ruh ba nga la kyrpad ia baroh ki seng ki kali tourist ban ai da ka jingthoh ia ki jingai jingmut sha ka Committee. Hadien ba kila aiti da ka jingthoh, ngin sa shong bishar ia ki, ngin sa iasyllok bad ki Tnad ba dei khmih lynti ka tnad Ain, Pulit bad Transport, kiba dei ruh ki dkhot jong kane ka Committee.
Ngin sa iasyllok ruh bad kiwei ki kynhun ba trei ia ki kam jngohkai bad hadien ngin sa shim rai ia ki jingai jingmut ki ban sa phah da ka Committee. Haba kylli ia ka jingdawa ka AKMTTA, u Director ula ong ba kane ka seng kala pynshai hakhmat ka Committee ba kim shym la dawa satia ban khang ia ki kali na Assam nama ki tip ba bun ki nongshangkai ki dei kiba wan na Guwahati Airport.
