Shillong, Naitung 15: U President jong ka party HSPDP u bah KP Pangniang mynta ka sngi u la phah da ka jingthoh sha u Lamphang ka iing dorbar thawian ka jylla u bah Metbah Lyngdoh u ba dei ruh u MLA jong ka Mairang Konstitwensi ha kaba u la ai jingmut ban ai kyrteng ia ka District Thymmai da ka North West Khasi Hills District.
U Bah Pangniang u la ong ba kum ka party ka ai khublei kyrpang ia u myntri rangbah ka jylla u Conrad K Sangma u ba la ai ia ka jingmynjur ban kyntiew kyrdan ia ka Mairang Civil Sub Davison sha ka kyrdan District hapoh kane ka jylla.
Ha ka Shithi u nongialam ka party HSPDP u la kdew ba kane baroh ka dei ka jingtrei shitom jong u bah Metbah kum u MLA jong kane ka jaka ha kaba u la trei da ka jingkut jingmut ban shakri ia ki paidbah ka thain bad kane ka long wan weng ia ki jingeh kaba ki riew paidbah ka thain kin ia kynduh.
Kane ka jingai District thymmai ka dei ka jingiohi jngai jong u mytnri rangbah ka jylla ban ai ia ka jingshakri jong ka sorkar kham jan sha ki paidbah, bad kum ka party ka pdiang sngewbha ia kane ka District thymmai ban kyntiew ia ka roi ka par ha katei ka thain.
