Shillong, Lber 13: U Lat jong ka jylla u Tathagata Roy mynta ka sngi u la pdiang ia ka jingai jingmut jong ka sorkar jylla ban weng noh ia ka Administrator Rule hapoh jong ka Khasi Hills Autonomous District Council.
Haba kren ha u SP News Agency u bah Aldus Mawlong Secretary jong ka tnad District Council Affair la iathuh ba u lat jong ka jylla u la pdiang ia ka jingai jingmut ban weng noh ia ka Administrator rule ha KHADC.
Na ka liang jong u Secretary jong ka KHADC ba dei peit ia ka Legislative, la iathuh ba ka khot ia ka dorbar jong ka KHADC ha ka 17 bad 18 tarik mynta u bnai ban jied ia u Chairman bad ia u Chief Executive Member jong ka KHADC.
Ia ka ilekshon ban jied ia u Chairman ka KHADC la buh ba kan long ha ka 17 tarik ha ka por 10 baje mynstep bad ia ka ilekshon ban jied ia u CEM jong ka KHADC kan long ha ka 18 tarik por 11.00 baje mynshtep.
Lah ban pynkynmaw ba ia ka AR la pynjari hapoh jong ka KHADC ha ka 7th Rymphang 2020 bad ka kong Matsiewdor War Nongbri kala shimti ia ka kam ban peit ia ka KHADC ha ka 8th Rymphang 2020.
