Shillong, Nohprah 22: Mynta ka sngi u bah Wankit Tynsong u la pynlait paidbah ia ka Ambulance jong ka seng Hynniewtrep Achick National Movement (HANM) ha ophis ka seng kaba don ha Mawkasiang ha ka jingiadon long ki nongkit kam ki shnat ka seng na kylleng ka Ri Khasi.
Haba kren shuwa ban pynlait paidbah ia ka Ambulance u bah Wankit u la ong ba ai kane ka Ambulance kan ai ka jingshakri ia ki duk ki rangli kiba don kam ia ka jingiarap ha ka por ba ki don kam.
U la ong ba ka seng HANM ka dei kaba la paw ha ka jylla bad ym tang ba ka trei na ka bynta ka jaidbynriew hynrei kala kner ruh shaibun ki jingiarap ia ki paidbah ha ka khia ka shon bad da ka jingdon ia kane ka Ambulance kan dang iarap shuh shuh ia ka jingtrei kam ka seng.
U Bah S Khingkai haba kren ha kane ka jingpynlait paidbah ia kane ka Ambulance la ong ba kum ka seng kala juh trei ban kyntiew ia ka bha ka miat jogn ka jaidbynriew, u la pynkynmaw ia kawei ka jingkren kaba ong “Wat ong aiu ka Ri kan leh na ka bynta jong ngi, hynrei dei ban kylli aiu ngan leh namar ka Ri”.
Shuwa ban pynlait paidbah ia ka Ambulance ka seng kala pynlong ia ka jingialang ban ia kren ia ki kam jong ka seng, ka seng kala shim ia ka rai ban pynthikna ba ha u snem ban wan kan pynthikna ka sorkar pdeng dei ban pyntrei kam ia ka ILP, ban pynrung ka ktien khasi ha ka khyrngit kaba phra bad ban pynbeit ia u pud u sam.
Ha kane ka jingialang ka seng kala jied ruh ia u bah Kyllang S Thongi kum u general secretary, nalor u bah Nelson Kharbani kum , la thung ia u bah Bawan Nongsiej kum u Vice President seng kmie, bah Will Sohsang kum u Assistant Secretary bad ia u bah Binos Myrshiang la thung kum u nongai ktien ka seng, kane ka long katkum ka jingiathuh u President ka seng kmie u bah Lamphrang Kharbani.
